DoSE-i school uniforms alitsü atema sen crore 11.96 endok

Kohima, March 28 (TYO) : Department of School Education, Nagaland-i school uniforms alitsü atema sen crore 11.96 talila endok.
Comptroller and Auditor General (CAG) of India-i March 31, 2016 tashi Nagaland nung Right to Education (RTE) Act 2009 mapa inyakba indang Report agütsüba nung iba osang shia lir.
RTE Act indang mapa inyakdang, bangdak ketdangsertemi kilen shia elementary school nung azünger tanur asadangba mapa meinyak, ta CAG-isa metetdaktsüogo.
Nagaland nung Primary Schools maliba ‘eligible habitations’ 164 aser Upper Primary Schools maliba ‘eligible habitations’ 125 tashi lir, ta CAG-isa ashi.
Audit agiba mapang Nagaland nung Government Schools nung tanur noklang nung shilem 50 agi tajemba liasü, kechiyong state nung aliba school tem rongnung Government schools shilem 73 lir. Iba ajanga RTE Act nung free & compulsory education mapa takok mongutetba sayur, ta Comptroller and Auditor General (CAG)-isa metetdaktsüogo.
Schools grants magütsüba ajanga Act nung lateta aliba den meputepi district asem nung kaketshirtem dang nungi sen lakh 30.03 fee saru. Maneni, Act nung lateta aliba ama masü Nagaland nung Directorate, District Education Officers aser Sub-Divisional Education Officers indnag office tem nung tesayur 457 tashi mapa lemzükja lir, ta CAG-isa shisem.
September 2016 tashi nung, Government schools nung tesayur 10,690 (65%) training magi liasü aser ibaji ajanga state nung shisaliok jenjang mejungi lir, ta CAG report nungsa metetdaktsüogo.