DoSE-i sorkar school tem nem tetuyuba agütsür

Dimapur, July 2, 2021 (TYO): Nagaland sorkari government school nung tekolakpur ajak pei pei mapa lemzükdak alitsü aser anogoshia school-i aotsü tetuyuba agütsüogo.

“Anogo ka nung teaching aser non-teaching staff 50% school-i aotsü atema inyakyim ka renemtsüla” ta Principal Director, Directorate of School Education, Shanavas C, IAS-i sangdong ka nung ashi.

“Teaching aser non-teaching staff ajaki COVID-19 inyakyim benshitsüla aser kidang nungi mapa inyakba staff tesadang kaji rongdak nüngdak atema phone/mail ajanga tongteptsü” ta paisa ashi.

July 6, 2021 tashi nung school tem nung tesayurtem mapa lemzüka aliba osang July 7 nü DEO/ Sr. SDEO/ SDEO nem agütsütsüla aser parnoki July 9, 2021 tashi nung Directorate dangi email- director.se.nagaland@gmail.com ajanga iba osang yoktsüla, ta Shanavas C-isa ashi.

Ano, July 9, 2021 matongdang school tekolakpurtemi pei pei DEO/Sr. SDEO/SDEO nem class shia admission magiba kaketshirtem tenüngtem agütsütsü. Iba indang osangtemji bendener July 13, 2021 tashi nung Google Drive ajanga agütsütsüla.

School tekolakpurtemi Tesayurtem/NGOs/Kaketshir teloktem/Arogo lennirtem den yaritepa admission magiba kaketshir tsürabur/Guardian den tongteptsüla aser parnok dang kaketshirtem maneni züngdaktsütsü ajungmesotsüla, ta Principal Director-isa ashi.

Academic Calendar 2021 atema Class VII tashi admission agitsü atema anogo August 8, 2021 tashi atsülangtsür. Class VIII aser temapur admission atema NBSE-i lateta aliba anogo agitsü, ta paisa metetdaktsü.

Special Admission Drive nung class shia admission agiba kaketshirtem indang tenüng August 14-18, 2021 tashi Directorate of School Education nem agütsütsüla, ta paisa ashi.

School aser Department ajanga Online/Offline Teaching-Learning maparen inyakba nung school tekolakpurtem aser tesayurtemi kaketshirtem akokba tashi yaritsüla aser Online/Offline mode mapa küma inyaktsüla, ta Shanavas-isa metetdaktsü.

Maneni, DEO/ Sr. SDEO/ SDEO temi parnok den mapa lemzüka aliba JEO/AEO/SIS nem Inspection duties lemzüka mapang shia school tem semdangdaktsütsüla, ta Principal Director-isa ashi.