Douma jila amakba mapang Chlorine amshia alitsü südi: OPCW

Douma, Metsüremi/March 02 (Agencies): Taoba küm April ita Syria linük nung aliba Douma jila amakdang chlorine amshia alitsü südi, ta alima nung chemical weapons amshiba mita reprangba telok ka ajanga ashi.
Organisation for the Prohibition of Chemical Weapons (OPCW) nung ketdangsertemi Hokulbarnü ashiba agi, tsükchirtem kübok nungi sorkar busemba teloki rakzükba jila amakba mapang miim aliba chemical, chlorine ya amshi.
April 7, 2018 küm iba yimti amakba mapang civilian ter dak tali asü aser iba yongji Britain, France aser United States linüktemi Syrian sorkar anema tayimtsü amshia amak.
Washington-i Syria sorkar aitsü aser parnoki chemical weapon amshi ta ashi, saka Damascus-ibo iba amala hadir kodanga mamshi ta shia liasü.
April ita tom nung bushisüngdangba mapang OPCW nungi ketdangsertemi Douma nung tesem ana semdanga tenük kuli alirtem den sensaksem kaa sampel tem bener arua liasü, koba OPCW den affiliate süa aliba national laboratories nung asadanga liasü.
Bushisüngdanger temi iba miim mozü tejangja amshiba kuli magütsü saka April 7, 2018 anogo miim aketba chemical amshiba kuli ngutet, ta ashi.
“Iba miim aketba chemical nung chlorine keta aliba sayur. Aser iba miim aketba chemical ya molecular chlorine amai lir,” ta OPCW-i sangdong ka ajanga ashi.
Chemical Weapons Convention kübok chlorine ya hadir ka ama amshiba nokdanger, koba Syria-ia 2013 küm mulunga agizük aser iba ya international humanitarian law kübok nokdanga lir.
Syria civil war mapang nunga nerve agent sarin aser chlorine amshiba kulitem OPCW ajanga nguteta lir.
Syria nung chemical amshia nüburtem dak amakba kuli bushitsü asoshi 2015 nungi 2017 tashi UN-OPCW team ka shimteta bushisüngdanga aru. Tensa kar nung Syria sorkari nerve agent sarin aser chlorine barrel bomb tem amshi aser Islamic State of Iraq and the Levant (ISIL mesüra ISIS) temi sulphur mustard amshi ta parnoki bushitet.