Doungel-i goal asem agüja NEUFC-i Chennaiyin FC akok

Guahati, Aenjeti 20 (Agencies): Rogonü Guwahati nung North East United Football Club (NEUFC) aser Chennaiyin FC tsüngta Indian Super League asayaba mapang North East United asoshi Seiminlen Doungel-i mezüngbuba hat-trick agüja Chennaiyin FC madak takok angu.
Doungel-i asaya tenzüker minute 42, 46 aser 68buba nung goal kaka agüja iba season ISL nung North East United-i tajungtiba nung takok angu. Iba edition nung India nunger asayar rongnungi mezüngbuba hat-trick agütsür ya arishi küm 24 tain Manipur nungi Doungel ya alitsü.
Indira Gandhi Athletic Stadium, Guwahati nung iba asaya tenzüker minute 79buba nung Chennaiyin FC nungi Anirudh Thapa-ia goal ka agütsütet.
Rongnü asayaba nung takok nguaka, North East United telok ya asaya 10 nungi home nung anaben aser away nung khen dang koka lir aser iba ajanga team 10 indang league nungi points 10 dang nguteta jenjang 9buba nung lir.
North East United den asayadang tamakok nguaka Chennaiyin FC ya asaya 11 nungi points 20 nguteta tanabuba jenjang nung lir.
Mezüng leg Chennai nung asayadang Chennaiyin FC-i 3-0 agi North East United koka liasü, saka 2014 küm tenzükba sülen North East United asoshi Doungel-i mezüngbuba hat-trick agütsüteta mang yangtetogo.
Rogonü masayadang North East United-i asaya 9 nung goal pezü dang agütsüteta liasü.