DPC-i I-Day nung Spastic Society semdang

Spastic Society of St. Mary’s Montessori & Higher Secondary School, Dimapur staff aser kaketshirtem den Dimapur Press Club (DPC) züngsemtem külemi tangokba noksa ka yangi angur.

Dimapur, August 15 (TYO) : Sorkar telok masüba lokti, NGO ka teinyaktsü shilem nung ajemdaker, tan  Independence Day nung Dimapur Press Club (DPC)-i, tesayur ana den kaketshir 29 aliba Spastic Society of St. Mary’s Montessori & Higher Secondary School (SMMHS), Dimapur semdang.
Spastic Society indang teratet ashiba mapang, SMMHS Principal Neena Dutta-i, tang aliba Spastic Society ya, tang alima nungi pilar aliba, la kinungbo indang nükla liasü. Pai iba school ajanga lokti nung matamabensartem nema anema alirtem den saku kaketshisatsü agütsütsü nükla liasü, ta ashi.
Iba institute nung sentong ka agiba mapang Spastic Society nung azüngertemi linük meimba ken ‘Vande Mataram’ nung tsüngsangba den musical tsüngsang-a ka ajanga shilem agi.
DPC Tir Moa Longkumar aser taoba mapang DPC Tongti Tezülur Paudi Rentta nati DPC tenüng nung SMMHS tesayurtem aser kaketshirtem den jembi.
70buba Independence Day nüngtem nung DPC-i Spastic Society aser kaketshirtem nem sempet aser chiyungtsü kar lemtsü.