DPC & KPC-i National Press Day amung

Dimapur, November 16 (TYO): Hombarnü Press Point, Dimapur nung Dimapur Press Club (DPC)-i National Press Day sentong ayongzüka mungogo.
Taküm anogomung atema omenji “The Impact & Import of Cartooning & Caricature as a Medium of Expression of Opinion” liasü aser Nagaland Page Yimozülur, Monalisa Changkija-i iba onük jembi.
“Oshi dena yimya tapu mashi ka ajanga osang, tebilemba, aser tangatetbatem belenshir aser itemji ajanga meimchir, kin aser lokti tsüngda telongjem mesüra telemsa adokdaktsür,” ta Monalisa Changkija-i ashi.
Kija aser loktitemi tangatetba tasentem magizükra, mulungsoba melira aser shisatsü tatsü süra cartooning aser caricature mangatettsü aser iba indang tajangzük mangutsü. Anungji asenoki temenünütsü aketba noksa aser langka ka indang noksa agi osang ka ashibaji agizüka angatettsü merangtsüla aser aji asünung dang iba indang tajung aser tajangzük metettsü aser lokti nung temelenshi bener arutsü, ta laisa shisem.
Monalisa-isa Nagaland nung cartoonist temi mapa tajung inyakba atema parnok ajak nem tenüngsang agütsü.
Taoba ita Assam Rifles-i Nagaland nung aliba Media House balala nem tetuyuba agütsüba atema olen ka jembidang Monalisa-i media nisung ajak dang pei sempet, mapa aser Fourth Estate reju tajungtiba nung amshitsü mepishia ayongzük.
Iba sentong nung Nagaland Post nungi Cartoonist, Meren Lemdur, Morung Express Yimozülur, Akum Longchari aser Tir Yimyim Yimozülur, K Temjen Jamir nungertemia o jembi.
Kohima nunga Kohima Press Club (KPC) aser Directorate of Information and Public Relations yaritepa IPR Conference Hall nung National Press Day ayongzüka agi.
Iba sentong nung taoba Eastern Mirror yimozülur, Abu Metha-i onük jembi.
Pai ashiba agi, osangzülurtemi onük kar sangdongtsü makokdang noksatem ajanga item onüktemji prokshir. Anungji cartoonist kati osang sangoktsüba angatettsü atema lokti nung telongjem nüngdaker.
“Media nung cartoonist temji kanga dang tongtipang shilem ka lir aser iba jagi loktii parnok agizüktsüla aser parnoki sangoktsüba osang angatettsü merangtsüla” ta Abu-isa shisem.
Iba sentong nung Freelance Cartoonist, Arien Jamir-i osangkaket nung cartoonist inyakba indang osang tatsüka lemsatep.
Sentong nung mendenji KPC Tir, Xavier Rutsa liasü, Kids for Fame, 2007, finalist Kimneihoi Vaiphei-i ken ka aten aser Assistant Director, Kepelhoutuonuo-i anküp tepela o jembi.