DPC-KPC senden nung onük pungu telemtetba agi

Honibarnü Kohima Press Club (KPC)-i Dimapur Press Club (DPC) den ajurutepa sensaksem alidang tangokba noksa ka angur. KPC-i Nagaland kübok district balala nung aliba press club ajak den ajurutepa aruba sülen April 9, 2016 nü DPC den ajurutepa iba sentong tembangogo.

Kohima, April 10 (TYO) : Kohima Press Club (KPC)-i Nagaland kübok district ajak nung press club tem semdangtsü sentong tenzükba tatemsabuba Dimapur Press Club (DPC) den ajurutepa tembangogo.
DPC-KPC külem senden nung onük pungu telemtetba ka bangzünga renem aser onüktem rongnung kümshia Directorate of Information and Public Relation (DIPR) den yaritepa press club ajaki November 16 nü National Press Day külemi amungtsü dena lir.
Yashi senden nungsa State Level Press Accreditation Committee nung KPC, DPC aser MPC nungi nübo kaka dendaktsütsü atema sorkar dang ashitsü telemtetba agi.
Nagaland nung media organizations balala nungi accreditation lemzükba dak alia küm 10 tema inyakba senior journalists accreditation asütsü atema takhangba agütsütsü lemtet, ta DPC-KPC senden nungsa telemtetba agi.
Senden nungsa, DIPR Director nungi temelaba lia working journalists nem gari atema Press Sticker agüjang ta DIPR aser State sorkar dang asüngdangtsü atema KPC-DPC nati lemtet.
Nagaland nung non-working journalist kari journalists jilu benshia tenüng tamajung bener arutsüba indang onük benoka olemtep aser iba dak sendakba nung DPC-KPC-i public dang pei pei district nungi press cluba den osang jangjashitsü atema mepishia metetdaktsü.