DPDB Kohima-i Mima nung ‘Modern Education’ workshop agi

Dimapur, October 24 (TYO): October 23, 2017 nü District Planning Development Board (DPDB), Kohima-i Mima Students Union den yaritepa Council Hall, Mima Village nung ‘Modern Education’ indang shisatokden ka ayonga agi.
Iba shisatokden ya modern technology aser social media amshiyim indang liasü aser tongti tesemdangerji Mechanical Engineering & NSMDC Parliamentary Secretary, Er. Vikho-o Yhoshii liasü.
Sentong nung o jembidang , Er. Vikho-o-i Village Adoption Committee züngsemtem dang Mima yimtsüng asoshi mapa tajung inyakba atema pelaba metetdaktsü.
Sentong nung Kohima College Principal, Dr. Watijungshi Jamir-i “tanü asenoki industrial revolution tasen ka nung alir aser iba ya ‘digital revolution’ lir, anungji lanurtemi iba putu nung alitsü atema angazüktsüla” ta ashi.
Sentong nung shisalen sayurtemji Technical Director & DIO Kohima, National Informatics Centre, Government of India, Er. J.G. Lorin Rengma aser Assistant Professor, Kohima College, Dr. Neikehienuo Mepfhuo na liasü.
Er. Lorin-i – ‘A cashless India through modern technology’ onük jembi aser pai ashiba agi demonetization sülen linük nung digital transaction aser digital payment application kanga ajungketogo.
Paisa, Unstructured Supplementary Service Data (USSD), Aadhaar Enabled Payment System (AEPS), e-Wallet, Unified Payment Interface (UPI) aser digital transaction apps- BHIM, SBI Buddy, SBI Pay nungertem indang temetettsütem metetdaktsü.
Dr. Mepfhuo-i ‘Social media and the youth’ onük jembidang, “social media ya osangtsüsang metetpelatsü aser tongteprateptsü atema sabang tajung ka kümogo saka talisa social media ajanga lanurtemi timtem ajurur” ta ashi.
Asenoki education curriculum nung digital literacy programme enoksemtsü nüngdaker aser ibaji ajanga cyber bullying, public shaming, body shaming amala khurettem koktettsü, ta laisa ashi.
Dr. Mepfhuo-isa tasümang amala noksa tamajungtem meprokshitsü ayongzük.
Social media nung iba ama noksa tamajungtem prokshiba ajanga lendong ajurur anungji asenoki social media amshidang kanga dang kümdangtsüla aser tangar atema bilemja amshitsüla, ta laisa ayongzük.
Sentong nung mendenji SDO(C), Jakhama, Alemyapang Longchar liasü, Chairman, Village Council Mima-i tesentepertem pela agizük aser President, Mima Students Union-i anküp tepela o jembi.