DPS Dimapur nung tetsütem anogo jelia among

Dimapur, May 6 (TYO) : May 6, 2016 nü Delhi Public School Dimapur nung azünger kg nungi class V tanurtem den tetsütem anogo kanga pelatepa jelia mongogo.
Tetsütem anogo jelia amongba sentong nung o jembiba mapang, DPS Dimapur Principal, B.N. Nanda-i, “Alima nung tetsü kaji tanur ka atema mezüng tesayur, shisa agütsür, lenmang tuyur aser aonung milen tesangwa ka ama lir. Tanur ka shisatsü nung aser loktiliba atema renemtsüba tsütsü tetsü ka teinyaktsü jenti lir,” ta ashi.
Pai, tetsü kati tanur dang lenmang tiendang nung jajatsü sayuba ajanga lokti nung tajangzük aludaktsür, ta sentong nung arua adener tetsütem dang pelaba metetdaktsü.
Onoki iba school nung azünger tanurtem nem technique tasen angazükdaktsütsü meranger aser ibaji ajanga tarutsü nung parnoki alima nung temulung ulua liyonga otettsü, ta ashidang, tanur ka item yimya nung anitettsü atema tetsütem teyari nüngdaker ta shisem.
Pro Vice Chancellor DPS Dimapur, Dr. Ao Toshi-i o jembidang, “Tetsütem iba sentong nung arua adenba ajanga tanurtem shisatsü rangben agi pelaba ngua kü mulung nung kanga kongshiogo,” ta ashi.
Nenok tanü iba sentong nung arua adenba ya parnok mulungjang nung teti atema alitsü, ta pai ashi.
Dr. Ao Toshi-i, DPS Dimapur-i tetsü kaji tashi aketba, makoktsü amai bilemba mapa nung takok bener arutsüba aser school den lungjemer inyaker nisung ka ama züngshir, ta shisem.
Tanur ka nükjidong tajung yutetba nung teyarir tajungtibaji tetsü ka ta shia, Pro Vice Chancellor-i tetsütem dang tebilemba tajung lira school den lemsatepba ajanga tanur ka ano tali tajungba kümdakja lokti asoshi nüngdakba nisung ka ka kümdaktsütettsü, ta ayongzük.
Tetsütemi tanurtem den külemi tsüngsangba, ken atenba aser sangro azüngba nung shilem agiba ajanga iba sentong kanga akhüm ketdakja liasü.
‘Wish Tree’ nung tetsütemi pei tanur kechi kümdaktsüner ibaji zülur iloka yutsüba sentong ajanga kanga pelatepa liasü aser iba sülen tanur ka tenük zübangtsür tenüng aika zülur inoka aliba pongdang nungi ‘Star Mother of the Day’ shimtetdaktsüdang class I nung azünger Lilovi Achumi tetsü shimtet.
Aji dang masü saka tetsütem sentong tapu balala nung shilem agiba ngua pei tanurtem kanga pelatepa aser nema danga reprangtep.