Dr. Abdul Kalam-i senmang toktsüba memetet

Rameshwaram (Tamil Nadu), July 31 (Agencies): Taoba mapang linük Tir aser asür APJ Abdul Kalam-i senmang kecha metoktsü ama bilemer, aser pa meyong kimong tilakaji tedi tambusang dang reprangang ta pai tamalen shia liasü.

Osangbenertem den jembidang Kalam tedi’er jabaso Jainulabdeen-i, “Kübu tanobu (Kalam)-i senmang toktsüba indang kecha meteta mali. Ka khen ka khen ta onok meyong kiojen/kimong aika yokogo. Anünga aliba ajak agi, akhidang yangluba ki aser iba anasaji Kalam tebu Avul Pakir Jainulabdeen-i pa (Kalam) nem toktsüba kimong tila ka lir,” ta ashi.

Scientist Kalam-i tedi tambusang Muthu Meeran Labbai Marakier dang pa kiojen/kimongji anepalua reprangang ta tamalen shia liasü.

“Onoki ibaji anepalua arudagi,” ta Kalam tedi’er jabasoisa ashi.

Mapang ka nungbo Kalam tetsü/tebou nunger kiojen/kimong-lumong tulu liasü, ta paisa ashi.

Kalam’er ki tejenji khenyongi balaka. Mezüngbuba tamentep ki takdangtem nungji museum ka lir, aser tanabuba tamentep ki takdangtem nungji tilateri shishilembadagi, kong Jainulabdeen-i yokya-yokchir.

Jamath züngsem kati ashiba agi, Ramzan mapang Muslim nunger tekülem kidang ‘porridge’ chiyungtsü asoshi Kalam-i küm shia sen lakh 1.10 tenla sa agüja liasü.

Taküm kümbo Muslim nunger benjung Ramzan matongdang Kalam-i pa meyong pension nungi par kinünger ajak nem sen yoka liasü, ta par kinünger kati ashi.