Dr.Aotoshi dak azükba aitsür

Dimapur, March 19 (TYO) : Honibar aonung 6.30 ako shi nung Purana Bazar, Dimapur anasa nisung kati Dr.Aotoshi dak azükba mapaji kanga sashia aitsür ta East Dimapur Business Association (EDBA), ACAUT aser Merangkong Senso Telongjem teloktemi sangdong balala ajanga aitsüogo.
Dr.Aotoshi ya Windows Media nung CEO aser Delhi Public School, Dimapur nung Pro-Chairman lir aser EDBA aser ACAUT nunga shisalen sayua nungiter tongtibang nisung ka lir. Pa ya Honibar aonung Dimapur town leni shiranger kar semdangi aluba mapang, Purana bazaar anasa gari kati pa mashilen nungi ajateta ao aser idangji iba gari jagi pa gari abelen tejaklen tera mereter oa anen aser iba gari anishisang jagiang ano meyiper kecha o jangjashitepa mejembii pa tenük achijilen anaben-asembenka azü alua tsüngoktsü. Iba nisungbaji Vinoka Khetoshe Awomi liasü ta jangjaogo aser pa ya Deobar anepdang Dimapur police-i pua lir.
Iba ama ozüng raksar nisungji nübortem asoshi lendong lir, anungji tan asütsüsa pa aser pa den alisang dena ozüng nung aliba ama merenshitsüla ta EDBA, ACAUT aser Merangkong Senso Telongjem Dimapur teloktemi District Administration aser police dang mepishia metetdaktsüogo.