Dr-Aotoshi dak azükba aitsür

Dimapur, March 21 (TYO) : March 18, 2017 (Honibar) aonung Dr Aotoshi dak azükba mapaji Chuchuyimlang Town yimteni kanga sashia aitsur, ta URBAN STATION COMMITTEE CHUCHU TOWN (USCCT) Vice-Chairman I.Zulutemba aser Tongti Tezülur Imnatemsu nati sangdong ka ajanga metetdaktsü.
Sangdong nungji, aibelener nem tekaratiba nung tapet temerenshi agütsütsüla ta akanger, ta shia lir.
Dr Aotoshi dak teka sangshiba ya Yimsem Ao Senso telongjem-i kanga sashia aitsür, ta Yimsem Ao Senso Telongjem, Dubagaon, Ekranipathar, Eralibill (DEE)-i nung Tir Sashi Longchar, aser Tongti tezülur Along Walling nati sangdong ka ajanga metetdaktsü.
Laishir kati iba ama mit mesotetba mapa tamajung inyaktsüji kanga tim masüba mapa ka lir. Iba den külemi tarutsü nungbo asen jila nung ketdangsertemi ‘wrong side’ nungi gari ajateta aoba kanga junga mita nokdangtsüla aser aibelenertem nem ozüngi melaba ama temerenshi agütsütsüla, ta kasa sangdong ajanga metetdaktsü.
Honibar aonung, Dimapur Purana Bazar anasa nisung ka tenüng agi, Venoka Khelashe Awomi-i Dr. Aotoshi dak azükba mapaji Merangkong Senso Telongjem Kohima ajanga sashia aitsür, ta Merangkong Senso Telongjem, Kohima (MSTK) Tir Takotemsu aser Tongti Tezülur K. Yanger natia sangdong ka ajanga metetdaktsüogo.
Anungji ozüng amertemi tekaratiba nung aibelener nem tapet temerenshi agüjang ta akanger, ta kasa songdang nung shia lir.