Dr. Benjongliba Aier-i ‘Agro sales & service centre’ lapoktsü

Dimapur, July 17 (TYO) : Agriculture parliamentary secretary, Dr. Benjongliba Aier-i Hokolbarnü Chumukedima nung Agro sales & service centre lapoktsüogo.
Iba Centre ya Bhartiya Farmers Agro Business Development Cooperative Ltd ajanga lapok aser lispour aluyimertem fertilizers, seeds, animal feeds, agri tools aser osettsüset nung tajangzük angutsü.
Asen state nung temo aketba ali tajung lir saka tsünüsenbongtsü kanga ajema tsünür aser iba ya tarutsü atema khuret ka lir. Tanü asenoki tsünüsenbongtsü tsütsü mapa shitak meinyakra asen state achiajemba nung khuret tulu ajurutsü, ta tanü Dr. Benjongliba Aier-i ashi.
Arem-min maangba, tarutsü atema mebilemi alu ayimba, ali raksaba aser tesentaktep tajung maliba ajanga asenoki aluyimba tsütsü tangar memeneper, ta paisa shisem.
Tsünüsenbongtsü timba tsünütettsü atema aluyimertemi metsüjang tajung, fertilizer aser ali nung temo adokdaktsüba nutrients amala shitak amshitsüla, ta Dr. Benjongliba-isa shisem.
Paisa, aluyimertem dang mechanized machinery tools amshitsü ayongzük. Item osettsüset amshiba ajanga nübo meindokba dang masü saka mapang tatsüka tsüngda ali tulu inyakteteter.
Bhartiya Farmers Agro Business Development Cooperative Ltd-i iba ama Centre tajung lapokba ajanga aluyimertem kanga ajangzüktsü ta pai BFABDCL nem tenüngsang agütsü.
Iba sentong nung SASRD, Nagaland University Dean, Prof Aleminla aser Director Central Institute of Horticulture, Medziphema Dr. Lalam nati o jembi aser mendenji TL Merry liasü.