Dr. Benjongliba-i Nagaland-Assam arrtsülen yimjung atema mapa tajung inyaker

Yajang-C, January 5 (TYO) : Agriculture Parliamentary Secretary & Chairman NSAMB Nagaland, Dr. Benjongliba Aier-i Mokokchung district kübok Yajang-C yimtsüng nung Border Peace Coordination Committee (A-N) züngsemtem, Gabharoo Festival organising Committee züngsemtem, Rankham village area (Assam) nungi lenirtem aser Yajang-C council members külem senden ka ayongzüka agi.
Yaküm April ita Assam kübok Rankham aser Nagaland kübok Yajang-C yimertem tsüngda arrtsü atema mangatettep adok aser iba atema state anapronglai tensa azüoktsü atema sepaitem mapa lemzükja liasü.
Tang iba tesem nung tensa tajungba kümogo saka yimtsüng ana tsüngda tesentaktep mejungi lir aser tanü senden nung Dr. Benjongliba-i tesentepertem dang akhidang nungi Naga aser Assam nunger tsüngda tesentaktep tajung aliba aser talisa Yajang o Rankham yimertem tsüngda tesentaktep tajung tanaben ayutsü tayongzükba agütsü.
Pa tanur asüba mapang Rankham nung hopta shia bazaar lapok aser iba nung par yimertem nüngdakba ajak angu aser Yajang nungertemia iba bazaar nung pei tsünütetbatem melentep. Iba mapang arrtsü indang mangatettep kecha maliasü aser yim anaprongi kati ka akhümtsübutep ta Dr. Benjongliba-isa ashi.
“Tanü-asüng, lenden nung aliba nisungtemi jila aser yimti nung aliba takar nisungtem nem arrtsü anasa tsünüsenbongba mapa inyakdaktsür aser parnoki alemli nungi Naga nunger li atsünga agir aser iba jagi arrtsü anasa aliba nübortem tsüngda mangatettep adokdaktsür” ta paisa shisem.
Iba senden nung BPCC(A-N) President, Bhaba Prasad Bora-i o jembidang Alongtaki constituency nungi MLA dang yimjung yanglutsü atema sentong ayongzüba atema pelaba ashi aser Dr. Benjongliba nem tenüngsang agütsü.
Rankham nung tongtipang lennir aser tesayur Indreswar Gogoi-ia Benjongliba dang kanga pelaba metetdaktsü.
BPCC(A-N) Vice President Imsu Jamir-ia o jembidang ashiba agi, anatsülen nungi nübortemi mulunga magizükra, ludeni yimjung bener marutettsü.
“Yaküm April ita Rankham-Yajang-C sector nung tensa mejungi akümdang idakji alirtemi BPCC(A-N) nem tiyongtsü nung mapa inyaktsü maongka magütsü aser ibaji ajanga onoki yimjung atema kecha meinyaktet” ta Imsu-isa metetdaktsü.
(Maneni tapak 9 nung…)