Dr Benjongliba-i school ki tasen semzüktsü; Moatsü benjung nung aden

Dimapur, May 1 (TYO): Hombarnü CAWD & Taxes Parl Secy, Dr Benjongliba Aier-i Government High School Alongtaki nung school ki tasen ka semzüktsü.
Iba school ya India nüjiso mangudang, Alongtaki Upper Primary School ta ser 1945 nung lapok. Iba school nung mezüngbuba headmaster ji Dr Benjongliba tebu, asür J N Aier liasü.
Tanü kinungtsüi meina Dr Benjongliba-isa Lakhuni nung Moatsü benjungmung nung tongti tesemdanger ama shilem agi. Iba benjung nung Longsemdang, Changdang, Nokpu, Saring, Chungtiayimsem aser Yajang C nungi village council tem aden.
Dr Benjongliba-i o jembidang, “1945 nung mezüngbuba Upper Primary School lapoktsü atema tenlaba, yariba aser shilem agiba atema Japukong nunger ajak tenüng nung Lakhuni yimer dang kanga pelar,” ta ashi.
Paisa, tetsü-tebou mapang nungi tzükongsangertem telongjem nung aruba meraksai tejakleni aotsü atema ayongzük.
“Nagaland nung tang NPF sorkar ya nübortemi shimtetba lir aser Centre-i senotsü lemzükba inyakyim melenshiba ajanga tayongzükbatem jenti ajuruaka, tajungtiba inyaktsü meranger,” ta paisa ashi.
Iba sentong nung Japukong Senso Senden aser Longsemdang, Changdang o Chungtiayimsem nungi Village council chairman temia o jembi.