Dr. Benny Prasad-i Nagaland nung Chai 3:16 kongsang ka lapoktsü jangrar

Dimapur, May 9 (TYO) : Mapang tatsütiba nung linük 257 sema senzüsang Dr Benny Prasad-i Nagaland nunga Chai 3:16 kongsang ka lapoktsü jangrar ta metetdaktsü.
Hombarnü District Public Relations officer Dimapur office nung osangbenertem den sensaksemdang, Dr Benny-i iba osang lemsatep.
“Tsüngremi nisung shia nükjidong balaka atema yanglu aser Nagaland nung aliba nisung taküm shiaji Tsüngrem tsüngdang senti lir. Ni Nagaland nung nisung ka taküm danga melenshidaktsütetra, iba jenjangji ulura asütsü” ta paisa ashi.
Dr. Benny-i Chai 3:16 Bangalore tenzük aser pai ashi ashiba agi, Hebrew oshi nung Chai tetezüji taküm lir aser Bangalore nung Chai café ajanga kaketshirtem aser lanurtem asoshi inyaker.
CHAI 3:16 lapoker ita 9 buba arur aser iba mapang lanur aika soseta asütsü aliba nungi kümzükogo. Tang CHAI 3:16 nung mapa inyaker parnok 15 lir aser parnok rongnung tesadang kaji Nagaland nungi lir, ta Dr. Benny-isa metetdaktsü.
Dr Benny-i tan agi trokbenbuba Nagaland semdangi arur aser pai Naga nunger nem tenüngsang agütsü.
Naga nunger dak molungsoba aser taochi tangatetba aliba aser ano kenten meimba atema pai tenüngsang agütsü. Pa asüng Bangalore-i aotsü aser idak nungjagi Israel aser Switzerland semdangi apusotsü.