Dr Donkupar den asüpila sentong agia pa mang remogo

Meghalaya Democratic Alliance (MDA) sorkar nung Cabinet Minister temi tanü Dr Donkupar Roy indang süngden kimai bener aludang agiba noksa angur. 

Sohra, July 31 (Agencies): Bodbarnü Meghalaya nung nisung meyirjang aikati taoba Assembly Speaker asür Dr Donkupar Roy Dkhar nem tetiuhi agüja pa mang remogo.
New Delhi nung Dr Donkupar temang anepalua aruba sülen July 28, 2019 nü pa asü.
Tanü Chief Minister Conrad K Sangma-i asür nem tetushi agüja jembidang nüktzü alua ajeb. “Ni ano kübo tanaben samaba ama bilemer” ta Conrad-i ashi.
Taoba Meghalaya Assembly Speaker asür Dr Donkupar Roy Dkhar’er kinunger kati pa melenzüktsüla ta United Democratic Party (UDP) working president aser Minister, Metbah Lyngdoh-i tanü ashi.
Saitsohpen tesem nung Dr Donkupar’er kidang pa den asüpila sentong nung jembidang Sohra-i “Dr Donkupar-i UDP president ka ama inyakdang nisung shinga mashioktsütsü tangatetba aser tenangzükba nung party len ani” ta ashi.
“Dr Donkupar-i politics nung tangatetba ka benshia aru aser pai onok dang ashioktsüba putu süitemogo ta ashi” ta Lyngdoh-isa shisem.
Dr Donkupar asübaji party, Shella Constituency nung alirtem aser state atema takoksa ulura lir. Ajisüaka, Dr Donkupar’er kinunger kati pa melenzüktsüla aser pa senmang agizüka inyaktsüla, ta paisa ayongzük.
Shella MDC aser Khasi Hills Autonomous District Council chief executive member (CEM) Teiñwell Dkhar-ia o jembidang asür Dr Donkupar-i state aser talisa Shella Constituency atema mapa aika inyaktsüba osang lemsatep.
CEM Dkhar ya Dr Donkupar den tesentaktep tajung alir ka liasü aser 1988 küm sen tashi melii Dr Donkupar-i election nung takok anguba pai bilemteta jembi.
Asür Bull Lyngdoh-i Khasi Students’ Union nung president inyakdang Dr Donkupar-i Alliance Reconstruction of Meghalaya State (ARMS) teyari ajanga takok angu.
“Ni pa akhüm kübok Shella nungi KHADC elections nung takok nguyonga aru” ta Dkhar-isa metetdaktsü.
Dr Donkupar tenü Saiñkupar-ia o jembidang tedi ajungbena asüba atema temulung raksaba metetdaktsü.
Paisa Shella nung alirtem dang 1988 nungi tedi kümsük tenetben tashi takok ngudakja aruba atema pelaba metetdaktsü.
Iba asüpila sentong nungsa Garo Hills nungi UDP lennir Beninstand G Momin aser Sohra Constituency nungi KHADC nung UDP member T W Chyne nati Dr Donkupar mangyimba osang lemsatep.