Dr. Imkongliba Memorial Volleyball Trophy tenzükogo; Naga nungeri alima den külemi renloktsüla: Dr. SC Jamir

November 20 nü Dimapur Govt. College Ground nung Dr. Imkongliba Memorial Volleyball Trophy tetenzük sentong nung tetushi tejaoker taoba mapang Maharashtra, Gujarat, Goa aser Odisha Angh aser taoba Nagaland Chief Minister, Dr. S.C Jamir aser Higher & Technical Education Minister, Temjen Imna Along Longkumer na den tongtibang nisung kar angur.

Dimapur, November 20 (TYO): Bodhbarnü Dimapur Govt, College Ground nung Dr. Imkongliba Memorial Volleyball Trophy tenzükogo; iba Trophy tetenzük sentong nung tetushi tejaokerji taoba mapang Maharashtra, Gujarat, Goa aser Odisha Angh aser taoba mapang Nagaland Chief Minister, Dr. S.C Jamir liasü.
Iba sentong nung jembidang SC Jamir-i, “Nisung tamajunger shisatsü ajanga asenok Naga nunger küm aika tetsüubu nung lia aruogo. Joko liktiliba tashitait ka yangertsü atema asenoki Tsüngrem tsübutsüla,” ta ashi.
“Tesüiba mapangtemji ammang tia nung liasü, ibayongji aonung nüngjang petinutem anguba ama lenirtemji nüngjang petinu amai liasü. Asenoki tesüiba mapang tatalokbatem metetetnüra, metettsü memelungra Laishiba nung shia aliba ama na tanur ka ama dang asütsü,” ta pai ashi.
Iba dak sendakba nung pai, “Asenok tanü iba jenjang nung aliba ya tesüiba mapang nisung kari tenla agütsüba ajanga lir, aser item rongnung kaji Dr. Imkongliba lir. Pa ya Nagaland kümteter rongnung ka aser NPC nung mezüngbuba Tir lir, aser pa lenisüba nung Nagaland state tentet. Tanübo asenok kanga tain kümogo, ajisüaka langka tai lir,” ta metetdaktsü.
“Dr. SC Jamir-isa, “Asenoki tarutsü lanurtem atema mangdang ayutsüla, ibaji ajanga parnoki iba linük yangerba nung kasa shilem agitsü. Asenoki kin aser linük dang masü saka alima den külemi renloktsüla. Ibaji Naga nunger atema kü mangdang lir,” ta ashi.
“Asenok teinyaktsü aika lir aser item rongnung ochi asentenshitsüla, tasü aittsüla, tazüokba alitsüla aser mapa kanga meranga inyaktsüla. Mapa meranga inyak nungang asenok renloktsü. Benjungbentsü nung mapang meindoktsüika saka na aser alima atema meranga inyaktsüla,” ta paisa ayongzük.
Lai o nung ajemdaker pai, “Temeshiba ajanga kin ka ajungketter, anungji asenoki temenen mapatem sendoker asen loktiliba yangerdi,” ta paisa ayongzük.
Paisa Dr. Imkongliba Memorial Volleyball Trophy tenzükja liasü.
Iba sentong nung tongti Host ji Higher & Technical Education & Tribal Affairs Minister, Temjen Imna Along Longkumer liasü. Sentong tetenzüklen Japukong Youth Organization Tir, Lanusunep-i lokti pelaa agizükba o jembi aser Tali Lkr Retired IAS, ASTD Tir, L Wati Jamir aser Japukong Senso Senden Tir, Meren Nokpu nungeria o tatsütsü jembia liasü.
Sentong nungsa Sashi & Asen nati ken tajung ka aten aser Minister, Temjen Imna Along Longkumer-i tepela o jembia liasü.
Iba Trophy nung team ajak agi 9-i shilem agir, aser tanü nikongdang mezüngbuba asaya Yajang ‘C’ aser MH 10 na tsüngda liasü aser MH 10 team-i akok.