Dr. Imtiwabang-i Süngkomen-Imchalu lenmang repranga senzü

Parliamentary Secretary, Dr. Imtiwabangi tang teyangludak Süngkomen-Imchalu lenmang repranga senzüba mapang pa den contract agizüker Vertex Construction Proprietor, Akato Y Zhimomi aser Saramati Construction Proprietor, K Bendang den ano Mokokchung PWD (R&B) department ketdangsertem densema angur. Imchalu, Oct 15, 2015.

Imchalu, Oct 15 (TYO): Brihostibarnü Nagaland Geology & Mining Parliamentary Secretary, Dr. Imtiwabangi tang teyangludak Süngkomen-Imchalu (yim) lenmang repranga senzüogo.
Pai iba lenmang repranga senzüba mapang contractor den PWD (R&B) nungi ketdangser aser mapa inyakertemi temulung süa inyakba tenüngsang olen ka metetdaktsü.
“Iba lenmang ajanga Asetkong sanger den yim aika tajangzük angutsü imlar” ta Dr. Imtiwabangi osangbenertem den jembidang ashi.
Iba maparen inyakdang Imchalu, Süngratsü, Chuchuyimpang aser Mokokchung yimtsüngtemi amalitepba asoshi parliamentary secretary-isa pelaba metetdaktsüogo.
Iba lenmang yagi Alongchen-Mangkolemba road den sentakteptsü aser Imchalu yim ya temo lima ka lir aser ano Mopungchuket ya raliwalir aruba yim ka asünung, iba lenmang ajanga Mokokchung nüburtem lenla aisü nung ajangzüktsü ngujem angur, ta paisa shisem.
Tarutsü nung ano Asetkong-Tzüsangra lenmang yanglutsü asoshi maparen inyakdaki ta paisa inyaka aotsüba mapatong kar lemsatepa liasü.
Iba lenmang ya Ministry of Road Transport and Highways (MoRTH) kübok CRF sentong nung inyaker. Kilometer ajak agi 17 aser iba lenmang atema sen 16.3 crores lemzükja lir ta angazüker.
Ibai ita 24 (küm ana) tashi nungbo yangluzüktsü asoshi ministry ajanga tetuyuba agüja lir. Aji saka, iba dang nungi tekaraba nung renemzüktsü imlar ta iba osangbeneri department nung ketdangser kar den jembidang parnoki ashi.
Iba lenmang yanglutsüba contract ya Vertex Construction aser Saramati Construction na sema (partnership nung) inyaker.
Iba mapa ya taoba August ita nungi tenzüka inyaker aser ita asem tsüngda nung joko noklang shilem nung shilem 35 (%) bo inyakmaogo, aser 2017 July matongdangsa ibai renemzüktsü imlar ta dept ketdangser kati ashi.
Iba lenmang ya taoba mapang nisung aikati yanglutsü merangogo, saka tang Dr. Imtiwabang mapang ibai mapa küma inyakteter ,ta osang ajanga angazüker.
Tanü Dr. Wabangi mapa inyakba tesem repranga senzüba mapang Vertex Construction Proprietor Akato Y Zhimomi aser Saramati Construction Proprietor K Bendang den ano Mokokchung PWD (R&B) Executive Enginner Er. Imnai anir par külem ketdangsertem densema liasü.