Dr Imtiwapang Aier-i NPF nung adenba kuli metetdaktsü

Sungratsü (Mokokchung), January 7 (TYO) : Brihostibarnü Geology & Mining Parliamentary Secretary, Dr Imtiwapang Aier-i Congress MLA temi DAN sorkar nung adenba kuli metetdaktsü.
Naga Yimten tebilemtsü pusema nungittsü aser tekaratiba nung iba onük atema telemtetba ka agitsü nükjidong nung parnoki TR Zeliang-i anir opposition maliba sorkar nung adentsü mulungtet, ta Dr. Imtiwabang-i ashi.
Tanü Sungratsü yimdak Senden Salang nung Sungratsü Senso Mungdang 69 buba Lokti Senden nung Dr. Imtiwabang pai iba osang metetdakja liasü.
Congress MLA tem ama party tashi itshidaktsütsü atema aser Naga Yimten tebilemtsü nung telemtetba tajung ka agitsü atema parnoki sorkar nung aden. Ajisüaka, Naga People’s Front-i aniba DAN sorkar nung adenba atema party-i parnok züngsem nungi anentsü aser iba jagi parnoki telok toktsütsüsa aküm ta paisa metetdaktsü.
“Kodamasüba tensa ajuruba agi ni party melentsüsa aküm aser kü kija masü saka tanüngba MLA temia kasaji inyaktsüsa aküm” ta Dr. Imtiwabang-i pa Congress nungi NPF nung adenba indang kuli agütsü.
Paisa, Sungratsü nunger dang yimtsüng atema rostrum ka yanglutsütsü nangzük aser ano tsükong atema central developmental project kar bener arutsü atema mapa inyakba osang metetdaktsü.
Iba sentong asoshi tongti o jembirji L Bendang Lemtor (IPS) liasü aser pai ‘senso ka temeten aser teinyaktsü’ indang onük jembi.
L Bendang-i ashiba agi, temeten aser teinyaktsüji külemi aoer saka tanü-asüng, nisungtemi pei teinyaktsü meinyaki temetentem ang talila bushir.
“Taküm nung chiyungtsüji angati mangur. Iba amaji angati atema dangbo temeten magütsütsü. Temeten agütsüra iba sülen teinyaktsütem anidaktsü” ta paisa metetdaktsü.