Dr Imtiwapang NLA Speaker shimogo

Kohima, March 21 (TYO) : Nagaland Legislative Assembly (NLA) nung Speaker inyaktsü atema arishi küm 44 tain Dr Imtiwapang Aier shimogo.
NLA Budget session mezüng anogo nung Dr Imtiwapang Speaker inyaktsü shim. Mongulbarnep Minister P Longon aser Minister Y Vikheho Swu nati pa tenüng benok aser ibaji Minister Chotisuh Sazo aser Parliamentary Secretary tem- Levi Rengma o Khriehu Liezietsu nungertem pusema nungit.
Speaker menden atema tangar tenüng shinga mali ta shia NLA Deputy Speaker, Imtikumzuk-i Dr. Imtiwapang shimba osang metetdaktsü.
Taoba Speaker Chotisuh Sazo-i yutsüba sülen iba menden tazüng dang liasü. February 22, 2017 nü Chief Minister Dr Shurhozelie Liezietsu-i Chotisuh Sazo Cabinet Minister inyaktsü shim.
Dr Imtiwapang ya 2013 State assembly elections nung Mokokchung district kübok Impur Assembly Constituency nungi Congress ticket nung takok angu. Ajisüaka, pa den külemi Congress MLA 7-i November 2015 nung NPF den züklok.
Taoba Chief Minister, T R Zeliang-i aniba sorkar nung pa Geology & Mining Parliamentary Secretary liasü saka taküm February ita nung sorkar ketdangsüba melentepba sülen CM, Dr Shurhozelie-i pa tenüng agiena liasü aser NLA nung 17 buba Speaker inyaktsü asoshi shim.
Ao Naga kin nungi Dr. Imtiwapang Aier ya mezüngbuba Speaker lir.
Tanü Chief Minister Dr Shurhozelie-i Speaker tasen Dr. Imtiwapang nem tenüngsang agütsü aser pai iba menden akhümket mesamadaktsüi kanga junga ketdangsüa aotsü ta tamang akaba metetdaktsü.
Speaker taseni assembly nungdang masü saka national aser international jenjangtem nunga pai mapa takok ngua inyaka aotsü imlar, ta Dr Shurhozelie-isa shisem.
Dr. Imtiwapang-i Speaker menden agizüka o jembidang, assembly nung züngsemtemi pa dak temulung lema shimba atema pelaba metetdaktsü.
“Speaker ka teinyaktsüji tezüpa masü aser iba tebilemtsüji ni angateta lir. Yimtenren mapa nung ni tangar ama balaka shia meteta mali aser aika ajangshia aruba nisunga masü. Ajisüaka, democratic tangatetba aser tesayuba nung tamang akar aser züngsemtemi amalitepa yariteptsü ta nangzükba nung temulung ulua iba mapa inyaktsü” ta paisa ashi.
Dr. Imtiwapang-isa NLA züngsemtem dang temeten atema mapa inyaktsü ayongzük aser paia Speaker ka teinyaktsü shitak inyaktsü merangtsü, ta shisem.
“Asenok opposition maliba assembly ka nung inyaker aser iba ya ajanga MLA tem indang teinyaktsü tuluba kümdaktsür. Anungji, külem züngsemtemi pei inyakba nung temulung lema melii, tali kümkümshitsü aser nübortem asoshi talila inyaktsü merangdi,” ta Dr. Imtiwapang-isa ayongzük.