Dr. Jitendra-i NE indang NEC ‘Coffee Table’ book sayatsü

New Delhi, September 21 (Agencies): Tanü New Delhi nung Union Minister of State (Independent Charge) for Development of North Eastern Region (DoNER), MoS PMO, Personnel, Public Grievances, Pensions, Atomic Energy & Space, Dr Jitendra Singh-i tang mezüng North Eastern Council (NEC)-i adokba Northeast indang Coffee Table Book sayatsüogo.
Coffee Table book nung tapak 180 lir, aser iba kaket ya tongtibangsüa noksa balala amshia Northeast indang sayaba den India Tir, Ato kilonser aser NEC mendenbuba ama DoNER Minister nungeri züluba osangtem aser North East nung aliba state ti nung taoba mapang Angh aser taoba Chief Minister inyakertem indang osangtem lir.
Iba sentong nung jembidang Dr Jitendra Singh-i, tesüiba küm ana tsüngda NE nung terenlok mapatem kanga kara kaogo, ibaji tongtibangüsa Ato kilonser, Narendra Modi-i NE atema kanga temelung agütsüba ajanga lir, ta metetdaktsü.
“Taküm May 27 nü NEC 65buba Plenary senden nung Narendra Modi-i jembiba jakdang, tesüiba küm 40 nung Shillong nung aliba headquarters nung Ato kilonser kati tanga NEC senden nung maden, aser ibaji ajanga kuli sayur,” ta paisa ashi.
“India’er ‘Act East Policy’ tali tashi itta inyaktsü aser tejang atangtsü atema anüdoklen arrtsülen tashi itshitsü nüngdak ta pai ashi, iba dak sentakba nung pai, DONER ministry-i senotsü agüja tang Tripura nungi Bangladesh tashi railway lenmang teyangludak osang metetdaktsü.
Ano Bangladesh den Land Boundary Agreement yangluba tan sorkari inyaktetba tuluka lir; iba ya Bangladesh nüchiso anguba sülen tesüiba küm 45 nung meinyaktetba ka liasü, ta pai ashi.
Dr Jitendra Singh-isa, October 3, 2016 nungi tenzüka Guwahati aser Aizawl tsüngda aser Guwahati o Silchar na tsüngda tayimtsü service tenzüktsü, ta metetdaktsü.
Tan sorkari mezüngbuba tayimtsüji April 1, 2015 nü New Delhi nungi Dimapur tashi tenzüka liasü, iba sülen Aizawl ashi indangindanga senzüba tayimtsü tenzük, ta pai ashi.
Dr Jitendra Singh-i, taruba küm ishika tsüngda NE State tem nung broad-gauge rail track ka agütsütsü, ta ashi.
Yashi Urban Development Minister, M. Venkaiah Naidu-i smart city 27 sangdongba nung Northeast nungi Nagaland nung Kohima aser Sikkin nung Namchi-a züngokba atema palaba paisa sisem.
Tesüiba küm ana nung NE-i ajangzükbatemji tanü sayaba Coffee Table book ajanga sangdongtsü imlar, ta paisa ashi.
Tanü iba sentong nung MP tem- Ramen Deka aser Jitendra Choudhary, Secretary DoNER,i Naveen Verma, NEC züngsem C.K. Das, Secretary NEC, Ram Muivah aser DoNER o NEC nungi Joint Secretary tem aser tongti ketdangsertem dena liasü.