Dr. Jitendra Singh-i NE Organic Showroom-cum-Restaurant semdang

New Delhi, May 28 (Agencies): North Eastern Regional Agricultural Marketing Corporation Limited (NERAMACL)-i North East Region nung tsünüsenbongtsütem ajungkettsü atema teti mapa inyaka arur aser iba telok ajanga NER nung aluyimertem aser agri-preneurs renloktsü atema tongti shilem agir, ta Union Minister, Dr. Jitendra Singh-i ashi.
Deobarnü Union Minister of State (Independent Charge) for Development of North Eastern Region (DoNER), MoS PMO, Personnel, Public Grievances, Pensions, Atomic Energy & Space, Dr. Jitendra Singh-i Dilli Haat nung North East Organic Showroom-cum-Restaurant semdangdang iba olen jembi.
Iba sentong ya Ministry of DoNER kübok NERAMACL ajanga “ONE” (Organic North East) omen nung ajemdaker ayongzüker. Iba sentong nung DoNER aser Ministry of Agriculture & Farmers Welfare, Govt. of India naprongi teyari agütsür.
“North-Eastern Region nung mozü mamshii tsünütetbatem indang linük nung nisung ajakibo memetet aser kodang parnoki iba ya meteta kümdir parnoki bushiyonga arutsü. Ibaji ajanga NER nung shishilembaba jenjang ajungketba dang masü saka aluyimertem senotsü tsütsü ajangzüktsü” ta Union Minister-isa ashi.
North East kübok tesem aika nung shishilembadak tajung mali aser ibaji atema NERAMAC-i mapa inyaktsüla. NER nung tsünütetba noklang nung shilem 80-82 shi ka mozü mamshii dang tsünüteter aser ibaji takok ngua shishilembatsüla, ta Dr. Jitendra-isa ayongzük.
Dilli Haat nung showroom-cum-restaurant ji tetenzüker dang aser DoNER Ministry-i iba sentong ya Delhi NCR ajungalen aser Mumbai, Chennai o Bangalore nunga inyaktsü, ta paisa ashi.
Dilli Haat nung North East Organic Showroom-cum-Restaurant nung North East state 8 nungi tsünütetbatem sayatsü aser ayoktsü. NER nung chiyungtsü tajung adokba ajungkettsü aser linük nung sensotemi temang anema alitsü asoshi chiyungtsü tajung achitsü tangatetba agütsütsü atema iba sentong ayonga agir.