Dr K Jayakumar-i taoba Congress lennirtem mesüzük

Dimapur, Aenjeti (January) 10 (TYO): All India Congress Committee (AICC) nung Nagaland charge, Dr K Jayakumar-i tanü Congress züngsem ajak dang party nung adentsü aser telemsa adokdaktsüba teloktem anema nokdaktsü ayongzük.
“Tesüiba mapang party toktsür aoba Congress lennirtem anema AICC-i tetuyuba agütsü saka ibaji meyipa agir. Anungji nenok ajak tanaben party nung denang aser telemsa adokdaktsüba party tem ket nungi Nagaland kümzükang” ta Dr. Jayakumar-i ayongzük.
Bharatiya Janata Party (BJP) ya Rashtriya Sayamsevak Sangh (RSS) indang mapa inyaktsür ka lir aser parnok indang tangatetbaji linük ka, tamangba yimsü ka, chiyungba yimya ka lir. Parnoki nisungtem dang achiajemtsü indang tetuyuba agütsür, ta paisa ashi.
Nagaland nung BJP den yaritepba teloktem dang Jayakumar-i “Nagaland nung alirtem taküm libaliro tsütsü nenokia BJP den külemi yaritepba nung temulung asür asü? BJP den yaritepba teloktemi Congress den ang yariteptsü atema bilemdangtsüla” ta metetdaktsü.
Naga yimten tebilemtsü atema jembidang, “India sorkar aser NSCN-IM tsüngda Framework Agreement agiba sülen Centre-i mapang talangka süia arudaktsüogo. Ajisüaka Nagaland nung democracy maparen tajungba inyaka aotsü atema Narendra Modi-i aniba sorkari tekaratiba nung tatembang telemtetba ka sangdongtsüla” ta AICC lennirisa shisem.
Nagaland nung Congress nem sorkar ketdang asütsü tashi agütsüra gari lenmang nung mezüng temulung agütsütsü aser gari lenmang jungra state indang rongsenkettsüng jenjang ajungkettsü, ta paisa ashi.
NPCC tir K Therie-ia o jembidang, Congress-i tekaratiba nung Naga yimten latetdaktsünür saka Election Commission of India (ECI)-i election agitsü anogo metetdaktsüra party-i shilem agitsü ta ashi.
Election matongdang Congress-i tanga teloktem den tesentaktep yanglutsü tebilemba lir asü ta osangbenertemi asüngdangdang, “Congress-i secular teloktem den tesentaktep yunür aser state nunga iba mesükba teloktem lir” ta K. Therie langzü.