Dr. Kiyasetuo Vizo aser S. Chubalila na den tepila sentong agiogo

Dimapur, Mongputeni/October 31, 2019 (TYO): Department of Soil & Water Conservation-i October 31, 2019 Brehostibarnü Directorate Conference Hall nung mapa nungi anisüngzüker ketdangsertem- Dr. Kiyasetuo Vizo, Project Director aser S. Chubalila, Superintendent na den tepila sentong agia liasü, ta osang ajanga metetdaktsü.
Sentong nung Director-i jembiba mapang pai, department atema anibelem arema sempet tajung amshia mapa tajung inyaktsüba atema mapa nungi anizüngzüker officer anaprongla dang pelaba metetdaktsüba den külemi tenüngsang agüja liasü.
Mapa nungi anisüngzüker officer den külemi inyaka aruba tajangshibatem lemsatepba mapang nung pai, Vizo ya department nung ketdangser tajungtibatem rongnung ka asütsü, ta ashi.
Sentong nung, Dr. Vizo-ia pa lanur mapang officer ka ama department nung ajemoker inyaka aruba mapang nungi mapa nungi anizüngzük tashi nung tajangshibatem indang yimdangi aruba lemsatepa liasü.
Vizo-isa, department nung pa nem lemzüktsüba maparen takok ngua inyaka aruba ya tanga kecha agia masü, saka kinungtsü-i kibong atema la mapa (career) bendanga toktsür nungitba ajanga lir, ta lemsatepa liasü.
Department nung officer tasentemi pei mapa jangrabangra inyakba den külemi parnoki iba wadang nung mongin akümtsü mulungsoa inyakba ajitetta, pai tenüngsang agütsü aser item officer ket nung department takok ngua achaayanga aotsü asoshi pai metetdakja liasü.
Maneni, sentong nung S. Chubalila-i jembiba mapang lai ashiba agi, Department renloktsü atema ajaki longjemer inyaktsüla. Laisa, taküm nung tamakoktem jia ajangshitsüla, ajiasünungang item tamakok nungi asenoki angazüker aser tarutsü nung tajungba inyaka aoer, ta metetdaktsü.
Iba sentong nung Joint Director S. K. Hekshe mendenbuba liasü. Addl. Director, K. Zhekheto Awomi-i tepela anküp o jembi.