Dr Longri-i Milak ayong ‘economic zone’ kümdaktsütsü ayongzük

Waromung (Mokokchung), February 6 (TYO) : Changkikong nunger dang masü saka Naga nunger ajak ajangzüktsü atema Milak ayong anasa aliba tesemtem ‘economic zone’ kümdaktsütsü merangtsüla, ta Honibarnü DAN & NBRM Chairman, Dr Longri-i ayongzük.
Waromung yimdak Changkikong Senso Mungdang (CSM) 72 buba lokti senden nung 29 Jangpetkong Assembly Constituency nungi MLA, Dr. Longri-i iba tayongzükba agüja liasü.
Paisa, Changkikong tzükongsangertem dang süngdonglidong aser arem shiruru wazüka ayutsü aser tzükong songjen ajanga ayimba Milak ayongji nübortem asoshi ‘economic belt’ ka jateta anepalutsü tayongzükba agütsü.
Changkikong tzükongji süngdonglidong aser arem shiruru nung takar lir aser iba tesem nung aluyimer aser entrepreneur atema teinyaktsü wadang jenti lir. Anungji nübortemi aluyimba nunga temulung agütsütsü aser meshisadangi nakmati tutetba inyakyim azüoktsüla. Ibaji asü nungdang Milak ayong tesem ji chichiba ‘economic zone’ ka akümtsü.
Dr Longri-isa Changkikong nung gari lenmang mejungi aliba indang jembidang ashiba agi, chief minister aser bangdak department temi iba khuret atema süoki ia bilemtsür aser pa inyakba kümsük matemdangsa lenmang yanglutsü, ta ashi.
Iba sentong nung Changkikong Senso Telongjem, Dimapur-i sobaliba ken ka aten aser Waromung Baptist Arogo nung Sannüker, Meren Molier-i temoatsü meshia sarasadem.