Dr. Motsuo Memorial District Hospital “Tobacco Free Zone” kümogo

Dimapur, Luroi/August 1 (TYO): Nüburtem temang anema toktsütsü aser mozüki aser temeket mereka ayutsü nükjidong nung Dr. Motsuo Memorial District Hospital ki, moapu aser gari anena ayudak ya “Tobacco Free Zone” ka asütsü ta sangdongogo.
Anungji mozüki telong aser temeket nung moko achiba, moko chir metsü metsüba nokdanger aser iba tetuyuba sülen manidakertem nem tapet temerenshi agütsütsü. Mozüki, Ki, Maopu aser gari anendak tesem nung moko tapu balala achiba tenokdangba agütsüogo. Moko mamshitsüba tetuyuba agütsüba kübok cigarettes aser moko chir metsü metsüba ciyongtsü aser “E-cigarettes” ajak densema lir.
Moko achiba shirangertem aser staff aser kidang kibong nung shirangertem moko achiba ajanga kongshidaktsürtem ajak nem iba chiyongtsü adoktsü asoshi teyari agütsür. Tobacco advertising mesera sponsorship mozüki telongtet nung kecha mesüdaktsütsü. Moko agi yangluba chiyongtsütem kecha faculty premises nung meyokdaktsütsü. Iba tetuyuba sülen manidakertem dang Cigarettes & Other Tobacco Products Act (COTPA) ozüng dak ajemdaker senchi sen 200 achitsü.
Sirangertem aser tesemdangi arurtem aser staff tem dang Tobacco-Free Policy indang mozüki telongtet nung pamphlets aser sign board tem ajanga tangazükba agütsüogo. Ajungji nüburtemi ajaki iba tetuyuba sülen anidaktsü mepeshir, ta ketdangser sangdong ka ajanga metetdaktsü.