Dr. Neilhouzu Kire GHSS Kma nung Legal Literacy Club tenzük

Kohima, October 13 (TYO): Nagaland State Legal Services Authority-i ayongzüka October 13, 2017 nü Dr. Neilhouzu Kire Government Higher Secondary School Kohima nung state nung tang mezüng school Legal Literacy Club tenzükogo.
Sentong nung Legal Literacy Club indang metetdaktsüdang Panel Lawyer Kohima District Legal Services Authority (KDLSA), Sanjib Rana-i, legal literacy club ya lokti, talisa kaketshirtem ajangzüktsü atema tenzüker, ta metetdaktsü.
Paisa kaketshirtem dang junga memetetibo legal dak sendakba shisa magütsütsüla, iba den külemi social networking sites amshidang kanga kümdangtsüla, ta ashi.
Role of a Para-Legal Volunteers onük nung jembidang Panel Lawyer KDLSA, Nulhuvolu Rhakho-i, PLVs ya nüburtem, talisa tepetzük tia nung aliba nisungtem nem legal teyari agütsütsü atema lir, ta ashi.
Laisa, PLVs ya Court aser nübur tsüngda apu laja inyaker ka mesüka lir, ta ashi.
Nulhuvolu Rhakho-i, PLVs temi Legal Aid Clinic nung Panel Lawyers den yaritepa inyaker, iba den külemi pei district front office nunga yariteper, ta ashi.
Lai ashiba agi, PLVs-isa Police stations, jails, psychiatric hospitals, children homes aser Observation homes semdangtsü akok.
Dr.Neilhouzii Kire Govt Higher Secondary School Principal, Bijano-i school nung Legal Literary Club tenzüktsüba atema Panel Lawyers dang pelaba metetdaktsü.
Tepela o jembidang Panel Lawyer, Khriesinuo Kire-i, Kohima district nung iba ama Legal club mezüng tenzükba school ji Dr. Neilhouzu Kire government higher secondary school ya asütsü, ta metetdaktsü.
Kasa sentong nung kaketshirtem nem Legal Literacy Club badges lemja liasü.
Ano külen tanga osang ka nung October 12, 2017 nü Peren District Legal Services Authority (PDLSA)-i Government Higher Secondary School Peren Town nung “child rights” onük nung otsüno züluba tetoktepba sentong ka ayongzüka agi.
Iba tetoktepba nung Class 11 nung azünger parnok 10-i shilem agi. Mezüngbuba, tanabuba aser tasembuba jenjang nung takok angurtemji- Kr. Idaizeule, Kr. Mercy Rengma aser Sp. Iheigumlung nunger liasü.
Iba sülen GHSS Peren Principal-i takoker asem nem certificates den senpet lema agütsü, iba den külemi shilem agir ajak nema shilem agiba certificates agutsü.