Dr. Neiphiu Rio-i Tuli sub-division renloktsü nangzük

Dimapur, March 12, 2025 (TYO): Chief Minister, Dr. Neiphiu Rio-i March 12, 2025 nü Mokokchung district kübok Tuli sub-division semdangogo.

CM Rio-i terenlok mapatongtem asadangtsü aser nübortem den ajurutepa sensaksemtsü atema Tuli semdanga liasü.

CM Rio-i nübortem den ajurutepa sensaksemdang sorkar policy tem, teinyakdak mapatongtem aser tarutsü sentongtem lemsatep.

Paisa Viksit Bharat@2047 nükjidong indang jembidang 2047 nung India linük renloktsüba alizüng nung Nagaland-ia putepa anidaktsüla ta ashi.

Linük nüjiso ngur küm 100 abensadang linük renloktsüba nung nübor ajaki külemi yariteptsüla ta Rio-i ayongzük.

“Foothill Road yangluba nung nübortemi shilem tajung agiba atema pelar. Nenok ajanga iba mapatong tashi itta inyaker aser sorkari connectivity o infrastructure tajungba akümtsü tenangzükba lir” ta CM Dr. Rio-i ashi.

“State sorkari Tuli nung railway connectivity tajungba akümtsü atema Ministry of Railways den jembitepdar. Iba train lenmang ya goods transport atema dang masü saka passenger services dendaktsütsü atema merangdar” ta paisa ashi.

CM Dr. Rio-i tongtipang onük ka jembisembaji Tuli Paper Mill asentenshia lapoktsü atema liasü aser iba ya nübortemi mapang talangka nungi aginüa aruba onük ka lir.

State sorkari 3ACSL Company den mill asentenshia lapoktsü atema tenangzükba agia inyaker. Iba ajanga mapa inyaktsü maongka den industry renloktsü ta paisa metetdaktsü.

Dr. Rio-isa nübortem dang meranga inyaktsü ayongzük aser mapa ajak inyaktsü ajungmesotsü.

Tanü pa Tzudikong Town helipad nung anenzükba sülen Wameken yimtsüng semdang aser idakji Wameken Village Council Hall (Panchayat Bhavan) tasen lapoktsü.

CM Dr. Rio-isa Kangtsung yimtsüng nung Sentimeren Memorial Watch Tower semdanga liasü.

CM Dr. Rio-i Longnakba Lenden Tuli Railway Station semdangdang sorkari Tuli nung connectivity tajungba akümtsü merangba indang ashi. Iba sülen pai Foothill Road yangluba tesem semdang aser rongsenketzüng o lokti renloktsü atema road infrastructure tajung alitsü indang jembi.

Tanü Rural Development & SIRD Minister Metsubo Jamir; Fisheries & Aquatic Resources Advisor A. Pangjung Jamir; Geology & Mining & DUDA Advisor W. Chingang Konyak; MLA Y. Mhonbemo Humtsoe aser MLA Benei M. Lamthiu nungeri Chief Minister Dr. Rio meina senzü.

Parnok den Additional Secretary to the Chief Minister, Sentiwapang Aier aser Mokokchung headquarters o Tuli Sub-Division nungi ketdangsürtem aden.