Dr. S.C. Jamir amokmerenba aitsür: CNTC

Dimapur, June 15 (TYO) : Ozüngi noktanga aliba CPI (Maoist) teloki Odisha Angh, Dr. S.C Jamir dang pa menden tokjang ta amokmerenbaji kukua aitsür, ta Central Nagaland Tribes Council (CNTC)-i metetdaktsü.
CNTC-isa Ravindra Verma aser Mantu ta ser nisung anati shidi ka nung Raj Bhavan pokdoktsütsü ta amokmerenba aitsür, ta sangdong ka nung metetdaktsü.
Ozüngi noktanga aliba telok kati Naga nunger jabaso ka aser lennir ka amokmerenbaji magizüker. Dr. S.C Jamir ya Nagaland nung taoba Chief Minister, taoba Lok Sabha MP, taoba Union Minister aser taoba Goa Angh lir. Pa ya Naga nunger atema dang masü saka linük ajunga atema otsüsür ka aser takotet yimten yimsüsür ka lir, ta CNTC-isa metetdaktsü.
Taoba mapang punguben tashi pa taküm agitsü merang saka Tsüngrem taochi ajanga tatalokba ajak nung pa kümzük, ta CNTC-isa shisem.