Dr. SC Jamir-i anir telok balalai asür J.N. Aier mang ayimer

Dimapur, February 13 (TYO) : Odisha Angh, Dr. S.C. Jamir-i sangdong ka nung J. Ngangshikaba Aier asüba osang angashia kanga aoksar ta metetdaktsü.
Asür J. Ngangshikaba Aier ji tesayur tajung ka liasü aser pai sayubayimya ajanga dang masü saka pai kaketshirtem kanga ketasena meimba ajanga nisung aika tia melenshitsü, ta Dr. S.C. Jamir-i sangdong nung shia lir.
Pa asübaji ni atema aria bilemtsür ka akoksaba dang masü, saka Nagaland asoshi chichiba meimchir ka akoksaba lir. Tasür kibong den asüku lemsateper aser asür tanela teti anisüngzük ngudakjang ta sarasademtsür, ta Dr. S.C. Jamir-isa metetdaktsü.
Ano, Agriculture Parl. Secy. Dr. Benjongliba atema Press Secretary, Lima Jamir-ia sangdong ka nung, 30th Alongtaki A/C nung alirtemi Dr. Benjongliba Aier aser par kinüngertem den asüku lemsateper, ta metetdaktsü.
Onoki teti meima aliba asür J. N. Aier iba lima toktsür aoba asoshi onok temulung züreper. 1945 küm pai Japukong Upper Primary School lapok aser iba school ya 30th Alongtaki A/C kübok mezüngbuba school lir. Iba school nung pai April 6, 1956 tashi headmaster inyaka liasü, ta Lima Jamir-i sangdong nung shia lir.
1963 küm asür J. N Aier-i Clark Memorial School, Impur nung headmaster inyak aser pa ya Japukong Kaketshir Mungdang(JKM) founding member liasü, ta paisa shisem.
Pai iba akümli toktsür aoba ajanga 30th Alongtaki A/C nung alirtem atema dang masü saka Naga nunger atema tesayur aser educationist tajung ka akoksaogo, ta Lima Jamir-isa metetdaktsü.
Iba tejashi mapang nung onoki asür kibong den asüku lemsateper aser Tsüngremi par kibong nem tesünep aser anisüngzük agüjang ta sarasademtsür, ta paisa ashi.
Dimapur Japukong Senso Telongjem Dimapur-ia sangdong ka nung Agriculture Parliamentary Secretary, Dr. Benjongliba Aier tebu asür J. Ngangshikaba Aier asüba atema mang ayimba aser asür kibong den asüku lemsatepba osang metetdaktsü.
J. N Aier-i iba lima toktsür aobaji par kibong atema dang masü saka Japukong Tzükong ajunga atema takoksa lir, ta DJDT Tir Imtinochet aser Tongti Tezülur Moameren nati sangdong nung metetdaktsü.