Dr.Senka Yaden temang tenla agütsüogo

Dimapur, March 15 (TYO) : Merangkong wabong tajung Dr.Senka Yaden, shiba US senso kümer Texas nung liasü, pa yashi March 14 anepdang pa kinungtsü  Theola Thedford toktsür  alima nungi pilaogo. Pa ya taruba ita April 21 nü arishi küm 90 ajungtsüba liasü.

Pa masüdang pai nangzükba ama, pa temangbo Medical Sciences, South Western Medical Center Texas nem Medical Research atema tenla agütsüogo. Texas yimti nung par kidang pa bilemtetba sarasadem mapang ka alitsü sentong renemdagi aser iba osang zülu tashi nung ano anogo aser mapangbo melemteti liasü.

Dr.Senka Yaden ya 1935 küm April 21 nü Mokokchung town nung aso. Iba mapang pa tebu Merangkong nunger Wb. Takojungba Yaden ya Dobashi liasü aser tetsü Mongchentsür Wt.Medemmakla Mokokchung mozü kidang nurse mapa inyaka liasü.

Dr.Senka Yaden ya Government High School, Mokokchung nung 1952 küm class ter renem. Pa ya primary school nung Class 2 aser 4 Board tatidang nung kanga junga takok anguba agi class ter tashi Assam government nungi Merit Scholarship agia azüng. Pa matric ajanger külen Wilson College Bombay nung B.SC renem aser Bombay University nung M.Sc tashi renema azüng. Iba sülen pa 1960 küm US-i ao aser Chicago University nung tesayur  mapa inyaka maneni azüng aser 1965 kümbo Minnesota University nungi Biology nung Doctorate (Ph.D) angu. Iba sülen maneni US nung scientist küma linük nem tajangzük tulu agütsüba reprangteta pa nem 1973 küm ‘Man of Science’ naroküm agütsü. Pa ya tesüsa Texas College nung tesayur mapa inyaker anen.

Pa ya lanuwa nungi ajemalu, tesüngjem aser meranga inyakba aser Tsüngrem aküm tsübuba nisung ka liasü. Pa dak Naga yimten meimba aser Naga yimten temeten angatetba shisatsü liasü. Dr.Senka Yaden US nung oa senso küma aliba agi Aotsür Aortem dang masü saka Naga nunger ajak atema paji tebu ka amai teyari tajung agütsür tsürabur aser lenir ka liasü.

Pa bilemtetba sentep sentong nung US nung alir par kinungertem den Texas nung alir Naga nungertema dena adentsü renemdagi.

Merangkong yimteni Senkalong mang ayimer

Merangkong Medemsanger Putu-ia Dr.Senkalong Yaden, US nung ‘Man of Science’, iba lima nungi pilaa aoba angashia asür kinungertem den mangyim jashi lemsatepba osang ka metetdaktsüogo.

“ Dr.Senkalong Yaden ya ajemalu, meranga inyakba aser Tsüngrem dak temulung lemtetba nisung ka liasü. Pa ya taküm nung mangdang tulu yur inyakba nisung liasü. Pa ya US nung nüngtugu nisungtem rongnung ka ta züngshi aser US nung tesayurtem rongnunga kanga nüngtugu tesayur ka liasü,” ta Merangkong yimtenisa metetdaktsü.

“ Dr.Senkalong Yaden ya 1966-67 küm Peace Camp Chedema nung Peace Mission Volunteer liasü. Pai pei lima sensosangertem nümadangtettsüsa alimai meteta pa tenzükba mapa nung takok tulu ngua inyakogo, “ ta Merangkong putuisa asür nem tenüngsang agütsü.

 “ Ano tanaben Senkalong ama ozü lima nung mesotet tashi onok mangyim manentsü,” ta parnokisa metetdaktsü.