Dr Shürhozelie aser par telok tilaba nem meyiptsür

Dimapur, August 27 (TYO): Dr Shürhozelie aser pai aniba telok tilabai NPF President, Neiphiu Rio lenisüba pusemba MLA tem dang “political tourists” aser party toktsürtem ta ajabaji temenünütsüka lir, ta NPF Press & Information Cell-i sangdong ka nung metetdaktsü.
Dr Shürhozelie ya taoba Nagaland People’s Council tenzükertem rongnunga maliasü. Naga People’s Front tentetba nunga pai balaka mapa inyakba kecha mali, saka pai kibur akümer aser antebong party atema pa tenüng agitsü meranger, ta sangdong nungsa shia lir.
1998 küm pa President lia NPC party-i General Assembly Elections mokdangba atema party de-recognized asütsü. Par den külemi inyakertemi memulungi, pai party toktsü aser Independent candidate ka ama 1999 Lok Sabha elections nung toktep saka tamakok angu. Anungji, pai tangar tenüng menüktsütsü temeten mali.
MLA aser party züngsemtemji toktsür aoba masü saka ozüngi melaba telok nung adenba dang lir. July 19, 2017 nü NPF telok tilabai Floor Test asütsü temulung moulutet, ta NPF PIC-isa ashi.
Election magi shimba Chief Minister Dr Shürhozelie-i Assembly nung pa indang majority mesayuteti jena ao aser ibaji Nagaland nung mezüngbuba atalokba lir, ta parnokisa shisem.
District Courts, High Court aser Supreme Court temi parnoki benokba ken o tem ajak magizük. Tang parnok taolen mali kümogo aser okadaktem dena ajak dak tai apur.
Onoki sen agi nisungtem mesüzüker ta tai tongloktsübaji tiyazü lir. Onoki onok pusemertem tangatetba akhümtsübur aser temulung alemer. Tawa by-elections nunga shibai sen amshi’ar ajaki temetetdang, ta NPF PIC sangdong nungsa ashi.
Party MLA aser CEC züngsemtem (2015 – January 31st 2020 tenure) nung zülua alirtem teimbakati Neiphiu Rio pusema nungiter. Iba list ji November 26, 2014 NPF General Convention sülen ECI nem agüja lir. CEC Member mesüra Central Office Bearer aridokba/ anentsüba/ tenüng benokba/ shimba ajanga iba list nung timtem kecha mangutsü. Iba nung telok tilabai tenüngtem benoktsü merangtsü akok saka ibaji ECI-i magizüktsü.
Kechi onüksa adokdir adokaka, tatembang telemtetbaji Election Commission of India-i agütsütsü. Anungji, party züngsem ajak dang tensa angatettsü aser shibai ozüng alema inyaker aser shibai India Linük Temzüng aser NPF Constitution kübok inyaker metettsüla, ta sangdong nungsa shisem.