Dr Shurhozelie-i aniba regional party mesamatsü: K Azo Nienu

Dimapur, October 27 (TYO): Dr Shurhozelie-i aniba regional NPF party ya mesamatsü ta NPF legislature party leader aser DAN chairman MLA, Kuzholuzo (Azo) Nienu-i ashi.
Hokolbarnü Agri Expo, Dimapur nung Western Chakhesang Mother’s Association (WCMA) lokti mungdang nung tongti tesemdanger o jembidang Azo-i ashiba agi, tang yimten tsütsü mepetmesü adoka aliba ya Lok Sabha MP aser taoba Chief Minister, Niephiu Rio-i New Delhi nung mapa inyaknüba ajanga adok.
“Rio-i CM menden toktsüba sülen mezüngbo MLA Noke nem melenzükdaktsünüa liasü saka ibaji matalokba agi pa tanaben MLA Kaito jatet. Ibaji ajanga Nagaland state nung yimten tsütsü mepetmesü adok. Ajisüaka, Election Commission of India-i tetuyuba agütsüba ajanga iba onük ya tembangtsü, anungji Nagaland nung alirtemi meratai dang atatsü mepishir” ta Azo-isa shisem.
“Naga loktilibai tenüngsang agütsüba amar, lutsütsüba dang meteta lir amai repranger. TR Zeliang-i aniba sorkari Public Distribution System (PDS), Fuel Adulteration aser Pillai ken o tem CBI jaoka bushisüngdang südaktsüra ni parnok nem tenüngsang agütsütsü” ta paisa metetdaktsü.
Naga nunger tsüngda telongjem maliba maliba küma aoer, anungji iba asoshi tetsürtemi mapa inyaktsüla, ta Azo-i ayongzük.
Laishiba nung Esther chubatsür den atishia jembidang, Tsüngrem tsübuba, temeim aketba aser yimya tajung tetsür kati loktliba, kibong aser telok ka küma yuteter, ta paisa ashi.
Sentong nung Chakhesang Mother’s Association (CMA) president, Zaposhelu Venuh-ia o jembidang, tetsütemi pei tanurtem dang pei oshioben sayutsü ayongzük.
Pei oshi ajanga nübortem longjemdaktsür aser ibaji kin ka asoshi maitsü lir, ta Zaposhelu-isa shisem.
Sentong nung Western Chakhesang Mothers’ Association president Bino Kenye-i tesentepertem pelaa agizük aser Western Chakhesang Hoho, Vekhosayi Nyekha-i o tatsüka jembi.
Lokti mungdang agiba sülen shisatokden ana tashi agi aser iba shisalen sayurtemji Additional District Sessions Judge Muzivolu T Therieh aser taoba Women Commission Chairman Sano Vamuzona liasü.