Dr Shurhozelie-i bye-election atema tenüng agütsüogo; Governor-i ‘Vote of Confidence’ agitsü metetdaktsü

Kohima, Jul 11 (TYO) : Tanü Mongolbar nü Nagaland Chief Minister, Dr Shurhozelie Liezietsu-i 10-Northern Angami-I Assembly Constituency nung tan ita July 29 nü bye-election agitsü aliba nung Naga People’s Front (NPF) tenüng nung tokteptsü asoshi tenüng agütsüogo.
Tanü Returning Officer takdang nung pa meyong ‘nomination paper’ agütsüba sülen osangbener den jembidang, ” tang NPF tatartem rongnung mangatettep liaka iba timtem ya ajanga NPF meraksatsü,” ta Dr Liezietsu-i metetdaktsü.
Tanüsa Nagaland Governor P.B Acharya-i Chief Minister dang July 15, 2017 tashi nung tatar senden nung tatartem pa den lir ta asüba telemtetba ‘Vote of Confidence’ ka agitsüla ta metetdaktsüogo.
Taoba chief minister, TR Zeliang-i pa chief minister akümtsü asoshi pa den MLA 34 den Independent MLA 7 lir, anungji pa nem government kümdakjang ta governor nem tezuluba nung agütsüba sülen governor-i iba osang ya metetdaktsü.
Iba amaji tatar senden jazüka ‘vote of confidence’ agitsübaji koma bilemer ta asüngdang dang, pai ano iba osangji mangu saka tang Kaziranga nung aliba MLA-temji yakta meyipa arutsü imlar ta dang ashi.
Par party nung pa anemertemi pa chief minister menden nungi malunüba agi bye-election agir ta aitsübaji koma bilemer ta asüngdang dang, ni chief minister kümner masü saka government aser party kümzüktsü mechi inyaker ta Dr.Shurhozelie-i langzü.
Paisa ashiba agi, par jabaso shibai pa menden aitsü aser CM den advisor inyaktsü shimba magizük, pa standby candidate asütsü.
Tanü Dr Liezietsu bye-election atema tenüng agütsüi arudang, pa den külemi Rajya Sabha M.P. K.G Kenye, Cabinet Minister-tem rongnung C.L John, P Longon aser Yitachu nungertem den Advisor Thongwang Konyak aser NPF Central Executive Council member-tem liasü.
Iba bye-election atema tenüng agütsütsü atema latettsüba tesüsaba anogoji asüng lir, aser asüng Bodbar nü Kekhrie Yhome-i Independent nung tokteptsü asoshi tenüng agütsütsüa akok.
Tenüng agütsübatemji shitak asü masü itemji tananü reprangdangtsü aser tenüng agüja liaka metoktepnüra July 15 nü tenüng meyipa agitsü akok.
Iba bye-election ya July 29 anepdang 7:00 ako nungi nikongdang 4:00 ako tashi polling station 25 nung agitsü aser August 3 nü vote azüngtsü aser iba election maparen ajak August 5, 2017 tashi nungbo tembangtsü asoshi Election Commission of Indiai metetdakja lir.