Dr. Shurhozelie-i Farmers award agütsü

DAN mendenbuba & Co-Convenor PAC, Dr Shürhozelie Liezietsu-i Kohima district kübok, Land Resources Development indang kaket lapoktsüba noksa nung angur. Iba sentong nung pai takok angur aluyimertem nem kulikaket aser senpet lema agütsü.

Kohima, March 23 (TYO) :   Farmers award agütsüba aser Kohima district kübok Land Resources Development department (LRD) indang magazine lapoktsüba, repa agiba sentong tanü Bodhbarnü Ura Academy, Kohima nung Chairman DAN & Co- Convenor PAC Dr Shürhozelie Liezietsu tongti tesemdanger süa agiogo.
Sentong nung o jembidang Dr Shürhozelie-i natural resources kanga ajema liakasa aluyimertem aser department-i kanga nendaka inyakba ajanga lipoküm aser yangji aliba kechisarena lirometema yutetba atema tenüngsang agutsüba sentong takok ngua ayongertem dang pelaba metetdaktsü.
Tang ama alima kanga kara melenshiba tensa ka nung sen len süiner tebilemba tajung aika raksar. Senji ajaki aginer aser ibai asenok ajak asoshi kanga nüngdak, ajisüaka nisung shia asentzü sena meranga inyaker aaba tajungba ta angatettsüla, ta pai ashi.
Iba sentong nung pai takok angurtem nem kuli kaket den senpet tem agütsü aser department indang ‘magazine’-a sayatsü.
Henbenji yim nungi arishi küm 56 tain, Nchyuga Tep-i IWMP kübok ‘Best Farmer of the year 2015’ sempet angu. Sechüma yim nungi Sechüma SHG-i ‘SHG of the year 2015’ sempet angu. Iba telok nung parnok züngsem ajak agi nisung 10 lir.
Iba den külemi Zubza-block kübok aliba yim tila ka, Thekrejuma yimi ‘Micro-Watershed of the year 2015’ sempet angu.
Kohima DPO, Dr Menuosietuo Tseikha-i, aluyimertem rongsen kettsüng tsütsü jenjang tajungba kümdaktsütsü mechi department-i iba project ya Kohima district nung aliba aluyimertem asoshi tenzüktsüba lir kechiba süra tanga district tem den metemdangra iba district nung aliba aluyimertem rongsen kettsüng jenjang kanga tajemzük tia ka nung lir, ta ashi.
Land Resources Department Director, Mhathung Yanthan-i aluyimertem dang tarutsü nung tang dang nungi tajungba inyaktsü aser nenoki meranga inyakba ngua state tesem balala nung aliba aluyimertem ajungmesoba den nükjidong tuluba yur inyaktsü junger, ta ajungshi.