Dr. Shurhozelie-i Nagaland nung 11 buba CM inyaktsü tenangzükba agiogo

Kohima, February 22 (TYO) : Arishi küm 81 tain, Dr. Shurhozelie Liezietsu-i tanü Nagaland nung Chief Minister 17 buba inyaktsü atema tenangzükba agiogo.
Tanü Dr. Shurhozelie den cabinet minister 11-i tenangzükba agia liasü.
Bodbarnü Raj Bhavan nung taoba chief minister T.R. Zeliang, MP Rajya Sabha K.G. Kenye, MLA tem aser NGO lennirtem lia, Nagaland Angh, P.B. Acharya-i Chief Minister tasen den cabinet minister tem tenangzükba agidaktsü.
Ano tanü, State Banquet Hall nung agiba sentong ka nung Chief Minister Dr. Shurhozelie-i Parliamentary Secretary 24 nem tenangzükba agidaktsü aser iba sülen CMO nung advisor 6 shimok.
Nagaland nung tang shimba cabinet nung tejak tasentemji- Chotisuh Sazo, Imkong L. Imchen aser G. Kaito Aye nungertem lir.
Tanü State Banquet Hall nung Dr. Shurhozelie-i party lennirtem den ajurutepa jembidang, sorkar indang tongtipang teinyaktsüji Arrla 371 aser ULB elections indang onük angatetteptsü atema public sabang ka tentettsü atema asütsü, ta ashi.
“Public-i tebilemba ajak lemsateptsü atema sorkari maongka agütsütsü,” ta paisa shisem.
Dr. Shurhozelie-isa cabinet minister tem dang asüngnep 9:00 ako tashi nung par kidang adenshitsü aser iba sülen parnok 9:30 ako meta Nagaland Civil Secretariat atongtsü ta metetdaktsü.
February 23 anepdang Nagaland Civil Secretariat nung sarasadem sentong ka agitsü aser iba sülen mezüngbuba cabinet senden amentsü, ta paisa shisem.
“Asenoki anogo aika akoksaogo aser takoksa anguba meyipa bener arutsü atema asenoki anaben agi talila mapa inyaktsüla. Asenoki longjemer inyakra, ajak takoktsü aser kechi ajurudir ajuruaka ajangtettsü” ta Chief Minister-isa tayongzükba agütsü.
Paisa cabinet minister tem dang külemi longjemer shisa agütsütepa mapa inyaktsü ayongzük.
Tatok agütsübaji yimya tajung ka lir aser ibaji ajanga loktiliba nung yimjung bener arutsü. Lokti nung yimjung aser tesünep melira, terenlok malitsü, ta paisa shisem.
Asenok tsüngda obang meputepi raratepbaji majung. Ministry nung MLA ajak maniokteter saka nübor tenzükba wadang nung ni nenok ajak indang nübo amshitsü renema lir, ta Dr. Shurhozelie-isa metetdaktsü.
Cabinet minister tem:
Kiyanilie Peseyie
Yanthungo Patton
P. Longon
C. Kipili Sangtam
C.L. John
Yitachu
P.Paiwang Konyak
Y.Vikheho Swu
Chotisuh Sazo
Imkong L. Imchen
G. Kaito Aye
Parliamentary secretary tem:
Kejong Chang
C. Apok Jamir
Deo Nukhu
R. Tohanba
Khriehu Liezietsu
Benjongliba
E.E. Pangteang
B.S. Nganlang
Shetoyi
L. Khumo
Er. Levi Rengma
Er. Picto Shohe
N. Jacob Zhimomi
Pukhayi
Amenba Yaden
Y.M. Yollow
Toyang Changkong Chang
S. Chuba Longkumer
Hukavi Zhimomi
Eshak Konyak
Khekaho Assumi
Er. Vikho-o Yhoshii
T.Torechu
Tovihoto Ayemi
Advisor tem:
N. Thongwang
S.I. Jamir
Imtilemba Sangtam
Naiba Konyak
Dr. T.M. Lotha
Kuzholuzo (Azo) Nienu