Dr. Shürhozelie-i tasen kümshitsü aser mulungsentsü merüktettsü ayongzük

Kisama, February 25 (TYO) : Angami nunger meshitetba benjung- Sekhrenyi amungba den külemi nübortemi tatok agütsüteptsü aser tesüiba amadoker pei taküm tasen kümshitsü aser mulungsentsü merüktettsü atema Nagaland Chief Minister, Dr. Shürhozelie Liezietsu-i tayongzükba agütsü.
Honibarnü Bamboo Hall Kisama nung Sekhrenyi benjungmung nung o jembidang, Dr. Shürhozelie-i lanurtemi pei sobaliba sübotsü agir benjung nung adenba angudang kanga pelar, ta ashi.
Alima ainba tenüng nung Naga nunger sobaliba takar ya samatsü akok. Naga nungertemi nüjiso atema rarar saka asenoki nüjiso indang chichiba tetezü kanga junga memetet, ta paisa ashi.
Asenoki asen sobaliba wazüka meyura, nüjiso atema rarabaji tetezü kecha mali, kechiyong maitsü medeni nüjiso malitsü, ta Nagaland chief minister-isa ashi.
1881 küm American missionary C. D King-i Angami nunger litsüi mezüng aru aser shitakbabo pa indang mezüngbuba teinyaktsüji Angami nunger nem Khristan yimsü agizükdaktsütsü atema liasü. Ajisüaka, C. D King-i nübortem den tajungba angatetteptsü atema shisaliok nüngdak ta ajiteta, pai mezüng school ang ka lapok, ta Dr. Shürhozelie-isa shisem.
Yimdaklir karibo tetsü-tebou nungeri amangba yimsü amanger aser ibaji tajung. Otsüla-oboula nungertemi tsüngrem aika külem aser parnok karbo tajung aser karbo majung liasü. Ajisüaka, America nunger missionary temi shisaluyimba aser Khristan yimsü bener aruba ajanga Naga nungertem alima ainba den külemi aintsü maongka agütsü, ta paisa ashi.
Dr. Shürhozelie-isa ashiba agi, “Mapang talangka Naga nungertemi Khristan yimsü mangateti aruogo. America nungertemi Naga nunger sobaliba aser yimyatsüya agientsü atema masü saka asenok tangatetba melenshidaktsütsü atema aru.”
Tanü Naga nunger teimba Khristan kümogo, saka asen oboula nungeri benshia arua yimya aser wainshin tajung aika samaa odar. Ajisüaka, iba meshitetba benjung amungba ajanga asenok dak akhi yimya aser wainshin tajungtem shia arudaktsütsü imlar, ta Chief minister-isa ayongzük.
Dr. Shürhozeli-i, “tetsü oshi indang jembidang, Naga nunger maitsü rongnung tongtipangji asen tetsü oshi lir aser kaketkeno nisung ka ama, ni tetsü oshi atema kanga süoki ia bilemer,” ta metetdaktsü.
Iba atema pai taintem dang lanuputu ajungmesotsü aser tetsü oshi metsünga reta jembitsü atema ayongzük.
Loktiliba shia putiotsü ka ka lir aser asenokia Naga nunger putiotsü meyipa reprangtsüla aser ibaji lanurtem dang sayutsüla, ta Chief minister-isa ayongzük.
Tanü sentong nung APO President, Dr. Vilhusa Seleyi-ia Sekhrenyi salem lemsatep aser benjung indang teratet metetdaktsü.
Sentong nung Rev. Fr. Alex Vizo-i temoatsü meshi aser Angamimiapfüko Krotho (AMK) President, Ruokouheü Miachie-o-i anküp tepela o jembi.