Dr. Shurhozelie Liezietsu-i August 13 nü tashi nung anentsüla: NPF

Kohima, August 10 (TYO): NPF Tir, Dr. Shurhozelie Liezietsu-i democracy alema kijai tashi amshiba inyakyim ajanga party nung lenisüba tsütsü mangatettep adokdaktsü, ta tanü NPF Press & Information cell-i sangdong ka ajanga metetdaktsü.
“Pai party nung tashi alia amshiba ajanga NPF Party ya kibong kati yimsüsüba kümdaktsü. Aser ibaji ajanga July 13, 2017 nü mangatettep adoka NPF Legislature Party-i NPF interim president atema Lok Sabha MP, Neiphiu Rio shim,” ta NPF-i metetdaktsü.
“Neiphiu Rio NPF interim President shimba sülen NPF Legislature party-i Dr. Shurhozelie Liezietsu anentsü atema pa nem anogo 15 züngzüktsüogo. Iba sangdong ya, Dr. Shurhozelie Liezietsu dang anogo 15 ji August 13, 2017 nü tembanger ta nenshia metetdaktsütsü atema lir, aser pai August 13, 2017 nü mesüra iba jakdang anentsüla,” ta sangdong nungsa shia lir.
“Iba denji külemi Dr. Shurhozelie Liezietsu dang, pai party meyong kiojen aser osettem, August 13, 2017 nü mesüra iba jakdang agütsütsüla ta nenshia metetdaktsür. Item tetuyuba amaji meinyakra onoki tim teinyaktsü inyaktsü, aser langka danga atalokra ibaji Dr. Shurhozelie Liezietsu ajanga asütsü,” ta NPF-isa metetdaktsü.
“NPF-i aniba sorkar nung onok 2/3 majority lir, aser NPF Party tashji nung ajemdaker onok majority lir, aser iba nungji ajemdaker onoki item tetuyuba agütsür,” ta NPF-isa metetdaktsüogo.