Dr. Shurhozelie Liezietsu-i mezüng anogo sarasadema tenzük

Kohima, Feb 23 (TYO): Pa jakdang inyakertem dang nungi balaka, Dr.Shürhozelie-i pa chief minister kümer mezüng mapa inyaktsü tenzükba anogo nung pa den külemi inyaktsü pur yimsüsür aser ketdangsertem jadena Nagaland Civil Secretariat nung sarasadem mapang ka agir Brehostibar nü nungi mapa inyak tenzükogo.
Iba sarasadem mapang agiba sülen pa den kilonsertem aser department shia nungi tekolak purtem jaoka shisalemsatepba senden ka agia liasü.
Iba senden nung Chief minister, Dr.Shürhozelie-i department shia nung tekolak purtem ajungshia ashidang, yimsüsürtem yabo oli aruli asütsü saka department nung ketdangsertem yabo mapa nungi manen tashi maneni alir, anungji government asoshi tongtibang telokji tongti ketdangsertem ya lir ta metetdaktsü. “Yimsüsürtem yabo tekong lu amai küm ka ana yimerbo toktsür saka ketdangsertem yabo tzülu amai küm aika alir,” ta paisa ashi.
Yimsüsürtem den ketdangsertema government nung dena lir aser government mapa takok ngua inyaka aotsübajibo department shia nung tekolak pur ketdangsertem dak dang keta lir ta chief minister-isa metetdaktsü.
Tawa anogo aika state nung nübortemi longkak aita mokdangba ajanga mapa inyaktsüba anogo aika laluogo, anungji item ajakji shitak küma inyaktsüsa yakta tensa mapang junga akümtsü imlar ta paisa ashi.
Tanü mezüng cabinet senden nung Nagaland nung akaba rongsen tajungba amshia tajangzük angutsü aser government inyakyim shitak aotsü asoshi shisalemsatepa liasü ta CM-isa metetdaktsü.
Iba ama bilema tenzükba mapatem ajak takok ngua inyaktettsü asoshi office nung inyakertem ajaki mapang shitak amshia mapa shitak inyaktsü nüngdaktsü ta paisa ashi.