Dr. T. Ao asoba Centenary amungtsü

Kohima, December 17 (TYO): Indian Olympic football asayar, Dr. Talimeren Ao, shiba dang Dr. T.Ao ta ajar, pa nem tim tetushi agütsütsü atema pa küm 100 ajungba Centenary benjungmung amongtsü atema state Angh, P.B Acharya-i ketdangsüa inyakdar.
Raj Bhavan sangdong ka ajanga ashiba agi, asür Dr. T. Ao-i linük, aser talisa Naga nunger atema mapa tajung jenti inyakogo, anungji pa nem tim tetushi agütsütsü tetemsü; pai linük nüma tangdaktsüogo aser Naga nungeria tangar den kasa inyaktettsü koka lir ta kuli sayuogo ta Angh-i ashi.
Raj Bhavan nung tongtibang nisungtem den külemi football mongin aser Olympic captain, asür Dr. T. Ao indanga noksa ka yuogo. Talisa Angh-i asür Dr. T. Ao nüngtem nung state nung college aser school tem nung awards aika tentetogo.
Dr. T Ao ya 1918 küm January 28 nü aso aser 1943 küm Mohan Bagan Football Club nung aden; London nung Summer Olympics alidang pai Indian team anir asaya aser 1950 küm Durand Cup nung pa Mohan Bagan nungi captain ser asaya.
Football nungi anisüngzükba sülen pa R.G. Kar Medical College & Hospital, Calcutta nungi medical degree ngua graduate asü aser 1963 küm Assistant Civil Surgeon aküm; tesülen pa Director of Health Services shim aser 1978 küm mapa nungi anisüngzük.
Angh-i state sorkar dang shidi ka ajanga, pa asoba Centenary ji küm piyong amongtsü aser pa nüngtem nung Postal stamp, commemorative coin ama adoktsü atema India sorkar dang mepishitsü asüngdangogo.
Taoba mapang Nagaland Angh, Shyamal Datta-ia Angh, P.B. Acharya dang asür Dr. T.Ao asoba centenary nüngtem nung teti atema tim tetushi agütsütsü asüngdanga liasü.