Dr. T Ao dak aketba sempettemji lanurtemi amangtsüla: Sonowal

January 13, 2016 nü Tuli nung LKM 31 buba Lokti Senden nung Minister of State for Skill Development, Entrepreneurship and Youth Affairs & Sports (Independent Charge), Sarbananda Sonowal pela agizükba mapang agiba noksa angur. 

Tuli, January 13 (TYO): January 12 Brihostibar aonung nungi tenzüka Langpangkong Kaketshir Mungdang (LKM) 31 buba lokti senden den saisapong sentong ‘Tekümküm Nükmen’ omen nung ajemdaker yangi Tuli town nung longsoa agidaki. Iba mungdang nung tejaoker meyi ana shi sentepa shilem balala agia dendaki.
Tanü Minister of State for Skill Development, Entrepreneurship and Youth Affairs & Sports (Independent Charge), Sarbananda Sonowal tongti tesemdanger ka ama arua pai LKM saisapong sentong meraketa tenzüktsüogo.
Sonowal-i iba sentong nung jembidang, Dr. T Ao shiba Indian national football team captain ser 1948 küm summer Olympics nung shilem agia linük nem konang bener arutsü, pa ya iba district nungi lir ta tenüngsang agütsü. Pa ama nüngtugu asayar bilemteta pa dak aketba sempet tajungtemji lanurtemi maneni amangtsüla ta paisa ashi.
Paisa Swami Vivekananda-i ashiba o ka atishia lanurtem nem tayongzükba ka agütsüdang, “tashi ajakji ne dak lir; nai tapu ajak inyaktettsü aser kechisarena inyaktettsü. Iba nungji tamang akatsüla; nai ne sasa na tashi maiti teli. Noktakang aser ne dak aliba temeshitibaji sadoka temai adokdakjang”, ta ashi. lanurtemi pei mulung tashi amshia taküm nung tebilemtsü balala koktettsü paisa shisem.
Tang asen sorkar yagi linük nung lanurtem atema tasa (skill) aser nübusen (personality) renlokdaktsüba maparen nung kanga temulung agütsür. Indian Prime Minister N. Modi-i Digital India, Skill India aser Make in India ama flagship sentong balala tenzüka arudaki, ibai India nung otsüsütsü ka asütsü, anungji, “lanurtemi iba maongkaji agitsüla” ta paisa ajungshia liasü.
Paisa par ministry indang kar ashidang, National Young Leaders Program (NYLP) tenzüka iba kübok; Neighborhood Youth Parliament (NYP), Youth for Development Program (YFDP), National Young Leaders Awards (NYLA), National Youth Advisory Council (NYAC) aser National Youth Development Fund (NYDF) nungertem lir. Item sentongtem ya tongtibangsa lanurtem lenisüba tsütsü aser pei sempet metetdaktsüba den pei luyim nung lanurtem tajungtiba kümdaktsütsü nükjidong yur tenzükba lir ta metetdaktsü.
Saisapong ya taküm lenmang ka lir, ibai mapang indokba ka dang masü saka iba ajanga asen taküm nung tasa (skill) tajung jenti agütsür aser ibaji asen taküm piyong amshia oteter. Saisapong ajanga nükjidong ka asoshi nisung ajak lungjemdaktsütsü lenmang lapoktsür ta ashi. Anungji, “asenoki iba telungjemji akhümtsübutsüla aser saisapongji ochishiba aser linük yangerba nung apu latsür ka ama amshitsüla” ta Sonowal-isa ayongzüksem.