Dr. T Ao Regional Football Academy lung azüngogo

Aami (June) 8, 2018 nü Seithekema C, Dimapur nung Chief minister Neiphiu Rio-i Dr. T. Ao Regional Football Academy yanglutsü atema lung azünga yutsüdang agiba noksa angur. 

Dimapur, Aami (June) 8 (TYO): State sorkari lanur maparen aser talisa saisapongtem asentenshidaktsütsü ta tanü Nagaland chief minister Neiphiu Rio-i ashi.
Sorkari sempet anguba saisapongertem nem senpet agütsüba dang masü saka saisapong ajungkettsü atema budget balaka lemzüktsütsü. State nung football asayamung- Nagaland Premier League tang anendaka lir saka iba asayamung tenzükdaktsütsü, ta Rio-isa ashi.
Tanü Seithekema C, Dimapur nung Dr. T Ao Regional Football Academy indang lung azünga yutsüdang Chief Minister-i iba osang metetdaktsü.
Dr. Talimeren Ao dang Dr. T. Ao ta aja aser pa ya medical surgeon ka dang masü saka football asayar mongin ka liasü. 1948 küm pa captain ser London Olympic nung India-i shilem agi. Paisa Assam aser Kolkata nung football club aika nung züngsem liasü aser pa nem tetushi agüja Academy lapoktsü.
North East Council (NEC)-i iba academy lapoktsü atema sen crore 13 teyari agütsü. Ano Tata Trusts-ia parnok corporate social scheme ajanga hostel facility, gym o artificial turf yanglutsü atema sen crore 15 agütsütsü, ta tanü Rio-i metetdaktsü.
Asenoki saisapong ajungketnüra asenok ket nung senotsü peria alitsüla. Saisapong nung private sectors-i teyari agütsür saka asen state nung yamaji mesüteter. Asenok ajaki iba academy ya tajung kümdaktsütsü aser tarutsü nung national aser international jenjang nung saisapongertem adokdaktsütsü merangdi, ta paisa ayongzük.
People’s Democratic Alliance (PDA) sorkar indang sports policy nung sports quota kübok mapa agütsüba shilem teimba kümdaktsütsü. State medalists aser national jenjang nung saisapongertem nem mapa inyaktsü maongka agütsütsü, ta tanü Youth Resource & Sports Advisor, Er. Zale Neikha-ia ashi.
Sentong nung Nagaland Olympic Association, secretary, T Meren Paul-i football asayar mongin Dr. T. Ao indang taküm otsü tatsü agi metetdaktsü.
Nagaland Premier League (NPL) ya 2012 küm tenzük aser iba mapang telok 10-i shilem agi. NPL ya 2012 aser 2013 season ana asayaba sülen teyariteper maliba ajanga mayongzükteti arur.