Dr T.Ao sor küm 100 nüngtem nung commemorative stamp saya

Kohima, Aenjeti (January) 28 (TYO): Dr. T Ao sor küm 100 ajungba anogomong nung tanü Raj Bhavan, Kohima nung Nagaland Angh, PB Acharya-i commemorative stamp sayatsüogo; Kasa anogomong nung Guwahati nunga Dr. T. Ao nüngtem nung commemorative stamp ka sayaogo.
Mapang tatsüka tsüngda Post Master General aser par teloki iba maparen takok ngua inyaktetba atema Angh-i Dept. of Post nem tenüngsang agütsüba den külemi Assam state-ia Dr. T. Ao nem akhüm agüja pa asoba anogomong amongba atema pelaba metetdaktsü.
Sen 5 jenjang stamp ya Kohima Head Post Office nung angutsü.
Nagaland Angh, P.B Acharya-i Dr. Talimeren Ao, Dr. T. Ao ta ajasang indang noksa ka sayatsü; iba benjungmong ya küm tepiyong mongyonga aotsü.
Iba sentong nung jembidang tongti tesemdangeri, Nagaland nungi football asayar mongin, T Ao ya kaketshisatsü nung ajungba dang masü saka saisaponga kanga jangrar ka liasü, ta ashi.
Paisa, Dr. T. Ao-i saisapong tsütsü 1937 küm Jorhat nung inter High school tournament nung ‘best sportsperson trophy’ anguba aser küm asem atonga Cotton College nung ‘individual champion’ anguba indang metetdaktsü.
1946 aser 1947 küm Calcutta University nung pai saisapong nung ‘Individual Championship’ anguba den külemi 1948 küm London summer Olympics nung Indian football team captian asüba dang masü saka Indian contingent atema wako abener liasü, ta paisa shisem.
Angh-isa, pai tsüngep tajung yutsüba ajanga Naga nung aika ajungmesoogo aser football asaya meimertem aika kümogo; pai football asayar ka aser doctor ka ama lokti aser linük atema mapa ajung inyakbaji tenüngsang agütsütsü tetemsü, ta metetdaktsü.
Saisapong ya kanga tongtibang, ta shia Angh-isa, National aser International saisapong asayatettsü atema state nung infrastructure facilities nüngdaker, ta metetdaktsü.
Pa küm 100 ajungba nüngtem nung Nagaland aser Assam sorkar napronglai commemorative stamp sayatsütsü aser pa nem akhüm agüja Guwahati nung Assam Governor’s XI aser Assam Chief minister’s XI tsüngda exhibition football match ka asayatsü, ta mtetdaktsü.
Sentong nungsa Dr. T. Ao’er tembar, Er. Lanu Toy-i, Nagaland nungi sotetba jabaso ka nem iba ama tetushi tulu agütsüba agi tzüra atemer, ta ashi.
Paisa, Dr. T. Ao dak alaka Naga nunger shingaia iba ama tetushi angutsü temsüa mali, ta ashi.
Pa ya saisapong nung ajungba dang masü saka kanga ajemalu nisung ka liasü, ta paisa shisem.
Dr. T.Ao’er kibong tenüng nung par jabaso tanubosang, Er. Indianoba Tally-ia, tebu asoba anogomung nung pa bilemteta akhüm tulu agutsüba atema pelaba metetdaktsü.
Paisa, tebui pa ajungkettsü atema kodanga mebilem, ajisüaka pai takok anguba nüngsang ajakji Tsüngrem nem dang agutsü, ta ashi.
Nagaland Olympics Association tenüng nung Meren Paul-i, Dr. T. Ao nem akhüm agüja, Indian football nung pa ya mongin asayar ka dang masü saka doctor tajung ka liasü, iba den külemi pa ya Nagaland dang nungibo Bengal nung nüngtuguba liasü, ta metetdaktsü.
Secretary, Youth Resources & Sports, Anenla S. Longchari-i lokti pelaa agizük, Principal Secretary, School Education, F.P Solo-i tepela anküp o jembi aser Sr. Pastor, BMC, Rev. Moa-i sarasadema liasü.
Sentong nungsa DG, Band-i “Jai Ho” ken aten aser TNCC-i Medley ken- Jubilate Deo/ My song tena liasü.
Iba sentong nungsa Department of Information & Public Relations-i Dr.T.Ao indang documentary ka sayaa liasü.