DRDA nung inyakertem ita sen mangur

Kohima, May 24 (TYO) : Nagaland nung Rural Development Department kübok District Rural Development Agencies (DRDA) nung inyakertem taoba ita ti tashi ita sen mengui timtemdagi, anungji item ita senji May 31, 2016 tashi nung magütsüra longkak aittsü ta tanü Mongolbar nü sorkar nem takangba ka agütsüogo.

Nagaland kübok district terkaprongla nung DRDA lir aser iba kübok inyaker Project Director nungi peon tashi nung inyaker 300 shi lir aser parnok nemji taoba küm September ita nungi tang tashi ita sen magütsüi lir ta tanü parnok inyakertem ajak RD Directorate nung sendena jembidang metetdaktsü.

Ketdangser kati ashiba agi, September 9, 2015 anogo nung sorkar nem ita sen manguba timtem shia tezüluba nung agütsü aser October ita nung longkak aittsü sentong liasü saka sorkari ita sen agütsütsü nangzükba ajanga iba sentongji thitem. Iba sülen December 22, 2015 nü July ita sen agütsü.

Department nung Junior Engineer kati ashiba agi, state sorkari agütsütsüba 10% magütsüi 2012 küm nungi aruba ajanga Ministry nungi sen meyoker, iba jagi ita sena magütsüteti tim atemer. Yaküm küm ita trok ita sen MGNREGA sen nungi apua agütsü ta paisa metetdaktsü.

Iba ama timtem ajuruba maremteti tang inyakertemi parnok nem 31st May, 2016 tashi nung ita sen agüjang mesüra  DRDA nung inyaker ajak pei inyaktsüba  “parent department”-i yoktsüla ta takangba agütsüogo.

Tanü DRDA nung inyakertem senden nung jembiba timtem aser temetenji angateta parnok nüngdakji sorkar den jembia inyaktsütsü DRDA Director-i nangzükogo.