Dream Inspiration teloki ‘guitar clinic’ ayonger

Kohima, November 28 (TYO): Tejangraba kasa aketer telok, Dream Inspiration-i Hotel De Oriental Grand, Kohima nung December 6 anüngdang 12:30 ako nungi Sweden nunger ken zülur ken mejemer aser guitarist, Kee Marcello den guitar clinic/master class, autograph, photography, interaction aser coffee session tem ayonga akatsü, ta Dream Inspiration nungi Takomanen-i sangdong ka ajanga metetdaktsü.
Sentong ayongertemi iba sentong nung tia takar ka nem Kee Marcello-i sign süa aliba Acoustic Guitar ka agütsütsü renema lir, ta pai ashi.
Kasa sangdong ajanga ashiba agi, iba sentong ajanga music meimer dang masü saka pa ajurunüa bilemertemia pa den ajuruteptsü maongka angutsü aser pai mejemba music angaba den külemi pa indang taküm otsü, ‘The Rock Star God Forgot’ nung zülua aliba ama pa kanga okronga intetba otsü ajanga temoatsü angutsü imlar.
Pai guitar atemaba tsütsü tain lunglong asüdang nungi tang tashi kanga bendanga agüja aser nendaka inyakba ajanga alima rangben atema music nung terenlok aika bener arutsüogo aser iba sentong atema Oriental Grand, Innovations, Decibel Sound System, Indihut aser tejangrar kar lokteper tenlar, ta sangdong nung shia lir.
Iba sentong asoshi ticket de Oriental Grand Hungry Panda, Burpp New Secretariat. Road, DUDA Guest house aser tesentepdak tesem na nung angutsü.