Drew Barrymore tekolak atsükba sülen mozüki nung anogo 2 among

February 10, 2017 (Agencies): Arishi küm 41 tain Drew Barrymore taruba movie nung tesadang zombie mesüka shilem agiba atema movie asadangba nung la tenüngsang aika ngudar. Aji saka film yangluba mapang nung shilem tem sentong yangluba ama aiben mataloker, aser yamaji la shilem ka yangluba mapang alanga mozüki-i bener ao.
Brehostebar aonung Seth Meyers show nung la shilem magi tsüngda la nisung ka tesülen joklokba sayu.
“Iba tatalokba anogo tom ka nung atalok. Chi chiyonga anisüngzükba sülen film nung iba shilem asoshi rehearsal akiba mapang ni nisungba dakji shilem nung aliba ama pongok, saka rehearsal dang asünung pa renema meliasü, aser pa nema aluba ajanga ni feet 6 shi lur atem nung tekolak ako.
Tanur ana tetsü ya tekolak tashi agi akoba sülen ambulance jar mozüki-i bener ao. Iba mapang piyong Drew-i lar jala ana; Olive (4) aser Frankie (2) la dak langka atalok nungbo kechi akümtsü ta shisabulua liasü.
“Ni ambulance nung tekong zübanger, marakzüteti bener oa alidang ajeb manenteti liasü, kechiyong ni kodanga meyirudang, aser jala ana atema bilemba agi kanga shisabulua liasü,” ta lai ashi.
“Ambulance nung kü anasa ENT ka mena liasü, aser pai kü dang kechiba ajeber? Tejeb ta shia liasü, saka ni pa dang langzübaji; ni asü mesera paralyze aküm nung kü jala ana koda asütsü? Nai tetsürtem tebilemtsü kecha memeteta na? ta pa dang asüngdanga liasü,” ta laisa shisem.
Iba tatalokba sülen la mozüki nung MRI, CAT scan tem agia anogo ana among, kechiyong parnoki tekolak atsükdang tekolok nung dena amshibaji awaktsü ta bilem.