DRI-i shiti tepu seret 17 apu

Guwahati, Aenjeti/January 3 (Agencies): Directorate of Revenue Intelligence (DRI) ketdangsertemi Bothbarnü shiti tepu seret 17 shi Guwahati nungi Silguri-i bener oya lia puogo.
DRI ketdangsertemi shiti tepu ya Siliguri tezülen Ghoshpukur tesem nung tata gari ka nung bener lia apu.
Iba tata gari (WB-23E-5533) ya Guwahati nungi aru aser Kolkata-i oya liasü, ta DRI ketdangsertemi metetdaktsü.
Shiti tepu pongtem pezü ya international shishilembadak sen crore 1.69 alang asütsü koba tata gari telung nung süngo talep ka nung alepsema bener liasü.
Iba dak sendakba nung tata gari anisang Subodh Das, 43 puogo. DRI sangdong ka ajanga ashiba agi gari anisang dang ken o ashishiba mapang pai shiti tepu ya pa nem Kamrup district kübok Baihata Chariali tesem nung amoktsü ta nangzük.
“Ken o buishisüngdangba ajanga shiti ya shi akartemi Assam nung khar iba tepu agizüka Bangladesh adena South East Asian linüktemi yoktsü atema Kolkota-i bener oya liasü ta ngutetogo. Shibelenertemi China, Japan, Thailand, Vietnam nung ozüng alema shishilembaba tesem nung item oset ayoktsü meranger,” ta ketdangser kati ashi.
“India aser kidanger linük nung arem shiruru khaa shibelenertem tsüngda tesendaktep ka yanglua lir,” ta paisa ashi.
DRI-i maneni iba ken o nung sendaka aliba nisungtem aputsü atema bushisüngdangdar.
DRI puri shiti tepu shibelenba ken o aika putetogo. Ibala mesükba ken o pezü tashi nung shiti tepu seret 38.604 DRI puri puogo aser iba dak sendakba nung nisung ti pua lir.