Drone amshiba ajanga US den tesendaktep junga meyuteter: Gen. Sharif

Rawalpindi, May 25 (Agencies): United States-i nisung memeni anüng nung yimdaktsüba drone tayimtsü amshia Pakistan lushi telung nung amakba maparen inyakba ajanga par linük den tesendaktep junga ayutsü maparen nem tetsükdakba bener arutsüba olen ka Pakistan mitkar lenisang, Chief of Army Staff (COAS), General Raheel Sharif-i tanü, Bodbar nü metetdaktsüogo.

US’er Pakistan ambassador, David Hale den Rawalpindi nung tentetba Pakistan mitkar tesepti, General Headquarters nung tanü ajurutepa senden ka amendang Sharif-i iba olenji metetdaktsü.

US-i mapang talang ka drone tayimtsü amshia Pakistan lushi telung nung amakba maparen meinyaki arur külen drone tayimtsü amshia Balochistan nung atsüka aliba Afghanistan Taliban telok lenisang, Mullah Akhtar Mansour taoba hopta tepsetba osang jangjaogo.

“US-i drone tayimtsü amshia Pakistan lushi telung nung amakba maparen inyakba ajanga US-i Pakistan’er peisasa pei madak yimsü asütsü temeten mezüngoker ta sayuba den külemi, yamaji inyakba ajanga asen linük ana tsüngda tesendaktep junga ayutsü maparen nem tetsükdakba bener arutsür,” ta Sharif-i nenshia ashi.

Pakistan-i taoba mapanga drone tayimtsü amshiba atema US aija lir.

US mitkartemi Pakistan kübok Balochistan nung drone tayimtsü amshia amakba atema Pakistan Ato Kilonser, Nawaz Sharif-ia taoba Deobar nütu US aitsüba olen ka metetdakja liasü.