Drugs apurtem nem senpet

Manipur nung taoba ita October 28 aser 29 nung police-temi ozüngi memelaba machimajemtsü ‘brown sugar’ aika apuba takok asoshi tenüngsang agüja Manipur government-i item police-tem nem sen senpet lakh semer agütsütsü lemtetogo. Ibaji ozüng raksaba mapa anema raraba tongpang akoktsü atema kanga junga rajema inyakba mapa ka asütsü. Parnok mapa nung jagi asenoka tangazüktsü lir. Manipur policetemi teti ozüngi memelaba machimajemtsü mozümora ayokertem nungi ganja ama aser brown sugar ama apuba angashir aser item rongnung tan October 28 nü Khordak Ichin ta ajaba tesem ka nung brown sugar kg 74 apu aser ano October 29 nübo Moijing Awang ta ajaba tesem ka nung brown sugar-sa kg 436 shi apu aser iba denji brown sugar yangluba laboratory ka dena putet. Iba senpet sen lakh 30 nungi lakh 20 brown sugar teimba apur police-tem nem agütsütsü aser lakh 10 ji kg 74 apurtem nemji agütsütsü. Brown sugar ya heroin ta ajaba mozü powder nung tanga chalk powder aser zinc oxide nunger mezütepa yangluba powder ka lir, iba jagi tereprangtsü nunga kanga temesüngbo masü brown aser yamaji jenjanga heroin powder dang nungibo kanga agia tajemba lir. Heroin powder yabo tereprangtsü nunga kanga temesüng, anungji ‘White powder’ ta ajar aser jenjanga kanga tasak. Heroin mesüra Brown sugar achirtemi item mozütem ya moko den külemi asüketer aser iba jagi parnokji alima balaka nung jangratema lidaktsür. Iba mozü ya khen chibarbo joko machi melitetter, anungji iba mozü lar kümadoker. Nagaland nung, ano talisa, Mokokchung district nunga iba mozü ya kanga bolua chiteper. Iba mozü achiba ya, yi ama masü, memenemer, anungji chir senzüyonga meputetter. Item mozü achirtem yagi o kanga nanga jembir aser mozü chir mapa kanga nendaka inyaker, anungji memetetertemibo nisung tajung amai bilemtsü, ajisüaka parnokji nüchi masü mozü agi anishir. Aji oda, mozüji chia-chia mozüa malitet sensak atener, anungji tiyazü jembir aser mapa inyaktsü mapang magütsütetter ta nisung tajung agi auer ashir küma lokti menentsür. Iba ama mozümora achiba ya wara aru ama, mapang mapang shia mozü tapu balala, khen khen ganja, khen khen kaini aser khen khen brown sugar ta bener arua chiba tenzükba agi lanurtem aika anojungi taküm samaogo. Tanüa kibong aika nung iba machimajemtsü mozü wara agi timtem aser takoksa agütsüdagi. Ano, asenoki kangasa mebilemdangi inyakba mapa kaji, aiben election agiba mapang ama nung, lenirtemi yi ajemba aser mozü achiba mapatem anema nokdaktsü melen lanurtem mesüzüka yi aser mozü agütsür. Ibaji asen lima yanglutsü melen asen lima raksaba mapa ka asütsü. Aji oda, asenoki lanurtem taküm yanglutsütsü melen raksatsür. Item ama takok aser tajangzük arishia mangateti inyakba mapatem anema inyaktsü asoshi asen state nunga police aser Excise department-tem lir. Parnokia mapang shia, Manipur nung ama, yi aser mozümora apuba osang angashir. Atangji, Nagaland nung inyakertemji Manipur nung inyaker mitkar amaji teyakyak masütsüa akok, saka khen khen parnoki ozüng raksar ket nungi ozüngi memelaba mozümora apudang, Manipur government amaji Nagaland government-ia reprangteta parnok nem tenüngsang senpet agütsüra, iba jagi teinyakertem pelatsü aser tasü aittsü. Alima nung ozüng raksar anema raratsübaji kanga tasak aser ozüng raksar ket nungi machimajemtsü mozümora aputsübaji mapa temela masü. Idakji mitkartem taküm aotsüba mapa tashi dena lir. Iba ama mapa nung takok ngua inyakertem nembo khen khen dang masü saka mapa nung takok ngua inyaktet shia yimjak nung tenüngsang agüja senpet agütsütsü tim. Tanü Nagaland nung ozüng shitak mamshitetba ya ozüng tai yangluba agi masü saka asenok teinyakertemi kati ka ajungshitepa shitak meinyaktetba ajanga lir. Asenokbo tang nungi danga ozüng raksaba mapa anema inyakba ya asen lima yanglur ta bilema ajungshitepa inyakdi aser ozüng raksaba mapa anema inyakertem tasü itdakja tenüngsang agütsüdi.